Qazaqstannyń 200-den astam eldi mekeninde «Halyq zańgeri-2024» respýblıkalyq aksıasy ótti, dep habarlaıdy Ulys.
«Halyq zańgeri» – álemde teńdesi joq qazaqstandyq biregeı joba. Aksıa respýblıkanyń barlyq aımaqtarynda bir ýaqytta bastalyp, halyqqa tegin zań kómegin kórsetýge baǵyttalǵan.
İs-shara memlekettik organdarmen, zańger ǵalymdarmen, tájirıbeli advokattarmen, notarıýstarmen jáne sot oryndaýshylarymen birlesip ótkizilýde.
Bıylǵy jyly respýblıkalyq aksıa Qazaqstan Respýblıkasy úkimetiniń qoldaýymen ótti. Uıymdastyrýshylar Qazaqstan Respýblıkasynyń Sybaılas jemqorlyqqa qarsy is-qımyl agenttigi, Qazaqstan Respýblıkasynyń Ádilet mınıstrligi, Zakon.kz jelilik-basylymy, «Paragraf» aqparattyq júıesi, Respýblıkalyq advokattar alqasy, memlekettik organdar, úzdik advokattar men zańgerler boldy.
Aýqymdy aksıa aıasynda 150 myńnan astam azamat tegin zańgerlik kómek aldy.
1000-nan astam sarapshy, onyń ishinde memlekettik qyzmetkerler, zańgerler men tájirıbeli advokattar, notarıýstar men sot oryndaýshylary bar.
Keńes alýǵa jeke kelýge múmkindigi bolmaǵan azamattarǵa Zakon.kz portaly arnaıy chat-botyn ashty. Mamandar Instagram jelisinde tikeleı baılanysqa shyǵyp, qazaqstandyqtardyń eń kóp qoıylǵan suraqtaryna jaýap berdi.
Aksıa barysynda azamattar kóbinese turmystyq qatynastar, muragerlikti zańnamalyq retteý, alaıaqtyq, sondaı-aq neke-otbasy qatynastaryn retteý, eńbek qatynastary jáne jeke tulǵalardyń bankrottyq rásimderi syndy máseleleri boıynsha mamandarǵa júgindi.
Sondaı-aq, azamattardy qabyldaý barysynda memlekettik organdardyń ókilderi sý tasqynynan keltirilgen zalaldy óteý tetikteri men zardap shekkenderge memleket tarapynan kórsetiletin kómek týraly túsindirme berdi.
«Halyq zańgeri» 2016 jyldan beri ótkizilip keledi. Aksıanyń maqsaty – azamattardyń túıtkildi máselelerin tez ári durys sheshý, sonymen qatar qazaqstandyqtardyń quqyqtyq mádenıeti men saýattylyǵyn arttyrý!