«100 jańa esim» jobasynyń úshinshi maýsymynyń jeńimpazdary anyqtaldy. «QazAqparat» halyqaralyq agenttiginiń habarlaýynsha, bıyl jobaǵa qatysý úshin 1673 anketa qabyldanyp, qatysýshylarǵa 700 myńnan asa daýys berilgen. Barlyq kezeńniń qorytyndysy boıynsha 32 jeńimpaz anyqtaldy.
«Qazaqstannyń 100 jańa esimi» jobasyna oraı uıymdastyrylǵan saltanatty jıynda jeńimpazdardyń biri – elimizdegi eń jas mektep dırektory Shákárim Seısembaı sóz bastady. Ol - elimizdegi eń jas mektep dırektory. «Bizdiń mektebimizde 213 qyzmetker, 2700 oqýshy bar. Ustazdyq qyzmettegi maqsatym – memleketimizdiń bilim salasyn brendke aınaldyryp, mártebesin arttyrý. Qazirgi tańda ókinishke qaraı, jastardyń ishinde, bilimdi azamattardyń arasynda mektepke baryp, ustaz bolyp bilim berý – úrdiske aınalmaǵan. Al bizdiń negizgi baılyǵymyz – jer astyndaǵy altyn emes, halqymyzdyń ushan-teńiz bilimi. Sol sebepten, bizge myqty ustazdar kerek. Sebebi, hannyń da, qaranyń da ómirlik ustazdary bolǵan», - dedi ol. Elordadaǵy №54-shi mekteptiń dırektory Shákárim Seısembaı Maǵjan Jumabaevtyń «Alty alashtyń basy qosylsa – tórdegi oryn ustazdiki» degen sózin eske saldy. «Bizdiń mektepterge belgili bir balans kerek. Iaǵnı, er muǵalimderdiń sanyn arttyrý kerek. Mektep – otbasy sekildi. Januıada ákeden, anadan tárbıe kórgen bala jaman bolmaıdy. Sondyqtan, er azamattardy mektepke qyzmetke shaqyramyn. Osy biregeı joba aıasynda jastarǵa oı salyp, ustazdyq mártebesin arttyramyn degen úmitim bar», - dedi ol.
Qazaqstan Respýblıkasynyń Qarýly kúshteriniń ofıseri, medısına qyzmetiniń podpolkvonıgi Sáýlet Qaldashov ta «Qazaqstannyń 100 jańa esimi» jobasynyń úshinshi kezeńiniń jeńimpazy atandy. Ofıser jaqynda ǵana Lıvandaǵy bitimgershilik mısıadan oralǵan. Sáýlet Qaldashov 2002 jyldan beri áskerı medısına salasynda qyzmet etedi. Kópbalaly otbasynyń otaǵasy. «Men BUU mısıasyna elimizdiń tarıhynda alǵashqy bolyp qatysýshy áskerı dárigermin. Biz serjanttar men ofıserlerden, áskerı dárigerlerden quralǵan 120 adam – qazaq rotasy jaqynda ǵana Lıvandaǵy bitimgershilik mısıadan sátti oraldyq. Mısıa basshylyǵy tarapynan qyzmetimizdiń nátıjesinde joǵarǵy nátıjedegi sheber jáne basqalarǵa úlgi tutarlyq qazaq jaýyngeri degen iltıpatqa ıe boldyq», - dedi ol. Sáýlet Qaldashovtyń aıtýynsha, áskerı dárigerler urys dalasynda moınyna qarý asynyp, qarapaıym medısınalyq sómkemen sarbazdardyń janynda júredi. «Mısıadaǵy bir jyl ishinde jergilikti Lıvan halqyna, sheteldik áskerılerge alǵashqy medısınalyq kómek kórsettik. Medısınalyq evakýasıany uıymdastyrdyq. Bir sózben aıtqanda, jergilikti halyqtyń jedel járdemi bola bildik. Men kórgen Lıvan jetpisinshi jyldardyń aıaǵyna deıin gúldengen el bolsa, qazir dinder men konfesıalardyń arazdyǵynan halqy jik-jikke bólinip, kórshi memlekettermen qarym-qatynasyn ornata almaı, berekesi qashqan el. Dáriger retinde biletinim: soǵys zardabynan alǵan psıhologıalyq jaraqat halyqtyń sanasynan ketpeıtini ras. Osynyń bárin kórip, túıgenim: bizdiń Qazaqstannyń basty baılyǵy - beıbitshilik pen tatýlyq eken», - dedi ol.
Sonymen qatar, bıylǵy «100 jańa esimge»: Reseıde 48 adamdy órtten qutqarǵan Semeı turǵyny Erjan Amarhanov ta endi. Ótken jyldyń tamyz aıynda tirkelgen oqshaý oqıǵany sol tusta qazaqstandyq jáne reseılik BAQ ókilderi men áleýmettik jeli qoldanýshylary jarysa jazǵan edi. 28 jastaǵy Erjan kólik satyp alý úshin «Semeı - Novosibir» baǵytyndaǵy avtobýspen jolǵa shyqqan. Biraq túngi saǵat úshke taıaý Aleısk qalasynyń tusynda avtobýstan órt shyqqan. Bul ýaqytta jolaýshylardyń barlyǵy tynysh uıqyda jatqan eken. Órt tutanǵanyn tek Erjan ǵana baıqapty. Ol birden júrgizýshige avtobýsta órt shyqqanyn habarlap, kólikti toqtatqansha jolaýshylardyń birazy tútinge ýlanyp úlgergen. Erjan osylaısha, ashylmaǵan esikti teýip ashyp, sanaýly sekýnd ishinde baladan qarttarǵa deıin bárin syrtqa alyp shyqqan. Avtobýs tolyǵymen janyp ketken. «Qazir oılanyp otyrsam, bala kezden sportpen aınalysqanymnyń arqasynda sol tusta adamdardy qutqara aldym dep oılaımyn. Bapkerlerimiz adamdarǵa kómektesińder, muqtajǵa qol ushyn sozyńdar dep úıretti. Sporttyń arqasynda aman qaldyq», - deıdi Erjan Amarhanov
Al taǵy bir jeńimpaz «Qazaqstannyń aýyr atletıkasynyń úmiti» atanǵan jattyqtyrýshy Ivan Snegýrov shákirtterimen birge tabandy eńbek etip, keleshekte el abyroıyn asqaqtatýǵa ýáde berdi. Qaraǵandylyq Ivan Snegýrov «Meniń atam men ákem – aýyr atletıkadan bapker bolǵan kisiler. Mine, sondyqtan áke jolyn jalǵastyrý kerek dep uıǵardym. 28 jasymda Qazaqstan Respýblıkasynyń eńbek sińirgen bapkeri atandym. Qazirgi tańda meniń shákirtterimniń ishinen Álem jáne Azıa chempıondary, respýblıkalyq deńgeıdegi rekordsmender de shyqty. Tabandy túrde eńbekti jalǵastyryp, startqa daıyndala beremiz. Alaıda qazirdiń ózinde 2024 jyly amandyq bolsa, Qazaqstanǵa Olımpıadanyń altyn medalin alyp kelemiz», - dedi elordada «Qazaqstannyń 100 jańa esimi» jobasynyń úshinshi kezeńine oraı ótkizilgen jıynda.
«Qazaqstannyń jańa esimderi» jobasynyń maqsaty - táýelsizdik jyldary Qazaqstannyń damýyna eleýli úles qosqan adamdardyń tarıhy mysalynda tabystylyq, básekege qabilettilik, pragmatızm jáne bilimge tabyný ıdeıalaryn ilgeriletý. «Qazaqstannyń 100 jańa esimi» jobasyna 1 673 ótinim kelip túsken. «Qazaqstandyq jas kásipkerler arasynan – 129 adam, aq halatty abzal jastardan – 106 adam, mádenıet jastarynan – 373 adam, qoǵam belsendilerinen – 307 adam, salaýatty ómir saltyn ustanatyn – 411 adam, ǵylym-bilim jolynda eńbek etip júrgen – 336 adam, jáne t.b. qazaqstandyq jastyń jáne Qytaı men Reseıdegi qazaq jastarynyń ótinimi qabyldanǵan eken.
Sýretter inform.kz saıtynan alyndy.