Валюта бағамы
  • USD -

    454.5
  • EUR -

    487.5
  • RUB -

    5.03
Тасқын суын кәдеге жарата аламыз ба
26 сәуір 2024
Тасқын суын кәдеге жарата аламыз ба

Кейінгі жылдары су мамандары Қазақстанда қуаңшылық кезеңі өтіп жатқанын жиі айтып кеткен болатын. Әсіресе Экология және табиғи ресурстар, Су ресурстары және ирригация министрліктерінің өкілдері өздеріне су тапшылығы жөнінде төтесінен қойылған сұрақтың бәріне «құрғақшылық кезеңі өтіп жатыр» деп жауап қатуға машықтанып алған. Жауыр болған жаттанды жауаптан жалыққан журналистер «Ол не деген бітіп бермеймін қуаңшылық» деп таңданатын. Биылғы тасқын Қазақстан аумағының бірыңғай шөлейттенуге бет алғаны туралы пессимистік теориялардың шегесін босатып кетті. Өйткені кейінгі 10 жылда қаңсуға айналған өзен-көлдердің ернеуі жіпсіп, айдындарға құс орала бастаған. Бұл жайттардан көктемгі тасқын шаруашылығы мығым, басқару жүйесі бекем ел үшін қатерден гөрі мүмкіндік көп әкелетінін көруге болады.

 ЖАЙЫҚТЫҢ ЖАҒАСЫ ҚАЙТА ЖАЙҚАЛА МА?

Жер шарының асты мен үстіндегі қылт еткен қимыл мен жылт еткен өзгерістің бәрін ғарыштан бақылап, табиғат өзгерістерін мезгіл бұрын болжауға мүмкіндік беретін технологиялар бар заманда ешбір мұхитпен шектеспейтін, құрлықтың қақ ортасында отырған Қазақстан қоғамында «Су – тілсіз жау» дейтін мақалдың өзекті болмайтын заманы жетті.

Тасқынның алғашқы толқыны еңсеріліп, қарғын су құрсауындағы ел-жұрт есін жия бастаған тұста жер-көкке жайылған тегін суды кәдемізге жаратып үлгермей, рәсуа етіп алмаймыз ба деген уайымдар айтылып жатыр.

Сәуірдің басында Төтенше жағдайлар вице-министрі Бауыржан Сыздықов биыл жазықтан жер-көкке су жайылып, қапыда қалғандарын айтқан.

«Елдегі 11 өңірде тасқынның алдын алып үлгердік. Қалған 5 облыста, байқаған болсаңыздар, су өзендерден емес жазықтан келіп жатыр. Шынын айтсақ, су біз күтпеген тұстан келді. Яғни, су даладан келді. Байқасаңыздар, кейінгі 30 жылда судың артуы даладан туындаған жоқ болатын», - деді ол журналистердің сұрағына берген жауаптың бірінде.

Демек, жазықтан жайылған су топыраққа сіңіп жоғалады деген сөз. Тасқынның екінші толқыны әсіресе трансшекаралық өзендердің бассейнінде болып жатқанын ескерсек, ол суды арнайы қоймаларға жинақтап, кәдеге жаратпау барып тұрған жауапсыздық болар еді.

Жайықтың суы биыл ерекше мол болатынын өрдегі Башқұртстан мамандары бізге қыстың ортасынан бері ескерткені мәлім болды. Сол есептері шынға айналып,  Иреклі су қоймасынан артылған су етектегі елді мекендердің халқын әбігерге салды.

Жайықтағы жойқын толқын бізге жеткеніне де аптадан астам уақыт болды. Жылда жылап ағатын Жайықтың асау толқындарын өңірдегі қаңсуға айналған қоймалар мен тоғандарға, көлдер мен көлшіктерге құйып үлгереміз бе? Осы сауалды Су ресурстары және ирригация министрі Нұржан Нұржігітовке қойып көргенбіз. Оның айтуынша, «Қазсушар» мекемесінің Атырау облысындағы филиалы Жайық арқылы келетін тасқын суды Каспий теңізіне бағыттау үшін қосымша 14,5 шақырым канал қазып жатқан көрінеді. Бірақ бұл каналды бетондау жоспарда жоқ. Өйткені Ресейден келетін судың көлемі жылда мұндай мөлшерде болады деуге негіз жоқ.

 Ал Батыс Қазақстан облысы Жайықтың артылған суын Жайық-Көшім суару жүйесінен Қамыс-Самар көлдеріне жіберіп жатыр. Бұл су өңірдің оңтүстік аудандарын ылғалдандырады деген сөз. Нұржан Нұржігітовтің сөзінше, бұл көлдерге кейінгі 20 жылда су бармаған.

Ресей мен Қазақстан арасындағы уағдаластық бойынша, Қазақстан  су орташа жылдары Жайық арқылы Ресейден 7,8 км3 су, құрғақ жылдары – 5,4 км3, өте құрғақ жылдары – 3 км3 су алуы керек. Жайық-Каспий бассейндік инспекциясы Жайық-Көшім суару жүйесіне өзеннен алатын судың көлемін құрғақшылық деңгейіне қарай өзгертіп отырады. Биыл  жүйеге Жайықтан 607 млн текше метр су алуға рұқсат берілген болатын. Бірақ Ресейден келіп жатқан судың болжамнан асып кетуіне байланысты ол меже 1 млрд текше метрге (1 км3)  дейін ұлғайтылып отыр. Осының арқасында құрғауға айналған Еділсор, Жалтыркөл, Бірқазан, Соркөл, Салтанат көлдеріне су жетті. Бұл жазда осы маңдағы жайылымдарды суаруға жұмсалады.

ТОБЫЛДЫҢ АРНАСЫ ТОЛДЫ

Қостанай өңіріндегі тасқынның әсерінен Тобылдың суы да 2000 жылғы деңгейіне жетті. Оның бойындағы Жоғарғы-Тобыл, Қаратомар су қоймалары 92% толған. Бұл қоймалардан жыл сайын125-150 млн текше метр су алынады. Осы есеппен алсақ, тасқыннан жиналған су алдағы 5-7 жылдың көлемінде маңайдағы шаруалардың қажеттігін өтеп, Тобылдың арнасын қалыпты деңгейде ұстап тұруға жетеді.

Мамандар биыл Астана су қоймасы 100 пайыз толғанын айтып отыр. Былтыр бұл қойма 82 пайыз ғана толып, жетпеген суды Қ.Сәтбаев атындағы каналдан алған болатын. Биыл сырттан су іздеудің қажеттігі жоқ. 

Ақмола облысындағы «Алва», «Кеңбидайық» лиманды суару жүйелері де 100% толған. Сондай-ақ, Целиноград ауданының Қозыкөш, Мұқыр және Қарасу өзендерінің арнасы да толық. Қорғалжың қорығындағы Теңіз көліне 1,5 млрд текше метр су жіберілген.

Қарағанды облысының су қоймалары да 100% толды. Мұнда жиналған су аймақ экономикасының қажеттіліктерін жыл бойы толық қанағаттандыруға мүмкіндік береді.

Ұлытау облысының Кеңгір су қоймасынан алғаш рет Сарысу өзені арқылы Қызылорда облысындағы көлдерге су жіберілді.

Былтыр Жамбыл облысы су тапшылығын тартып, шаруалар біраз шығынға ұшыраға.

«Жамбыл облысының Тасөткел су қоймасынан Шу өзеніне су жіберілді. Бұл су сәуір айының басында Түркістан облысы Созақ ауданына жетті. Тасөткел су қоймасынан су жіберу жұмыстары 1 мамырға дейін жалғасады. Осы аралықта Шу өзені арқылы Созақ ауданына шамамен 1 млн текше метр су түсуге тиіс», - дейді министр.

Биыл Ертісте де су мол болатын түрі бар. Қазірдің өзінде өзен суын табиғат қорғау шараларына жіберу басталып кетті. Бұл Павлодар облысының жемшөп базасын нығайтуға септігін тигізбек. Жалпы биыл Ертістің бойындағы су қоймаларынан береді. Су қоймаларынан жалпы көлемі 6,3 млрд текше метр су жіберу жоспарланып отыр.

Іле өзенінен Алматы облысындағы Қапшағай қоймасына келген су көлемінің мол болуына байланысты Балқаш көліне су жіберілген. Соның арқасында 1 қантар мен 24 сәуір аралығында Балқаштың деңгейі орташа 15 сантиметр көтерілген.

RELATED NEWS
Big data
19 желтоқсан 2018
Big data

Big Data-ның таңқаларлық өсуі

Бәрі Дижитал дәуір басталғалы бері адамзат жинаған мәліметтер жарылысынан басталады. Бұл әрине, компьютерлер санының көбеюімен, Интернетпен және біз өмір сүріп отырған әлемнен мәліметтер жинайтын технологиялардың пайда болуына байланысты. Мәліметтер өздері жаңадан ойлап табылған жоқ.  Компьютер дәуірі мен мәліметтер базасынан бұрынғы қағаз жазбалар, архивтегі материалдар мәліметке жатады.  Компьютерлер, электрондық кестелер, мәліметтер базасы сол мәліметтерді үлкен ауқымда сақтау мен ретке келтірудің әдісін берді. Аяқ астынан сізге мәліметтер «тышқанды» шырт еткізу қалуы арқылы қолжетімді бола қалды.

Дегенмен алғашқы кестелер мен мәліметтер базасынан бері ұзақ жол жүрілді. Мысалы бүгін, екі күнде жасалып жинақталатын мәліметтер адамзаттың 2000 жылдарға дейін жасалған, жиналған мәліметтерімен бірдей екен. Иә, иә әрбір екі күнде. 2020 жылдарда дижитал мәліметтер  шамамен 5 ZB-дан (зетабайт) 50 ZB-қа ұлғаяды екен. 1 ZB = 1000000000000 GB.

Бүгін, біздің әрбір жасаған қадамымыз «дижитал із» қалдырады. тіпті дүкеннен бір зат алсаңыз, мұның бәрі мәлімет ретінде сақталып, қатталып қалады.

Яғни, біздің әрбір дижитал ісіміз «дижитал із» қалдырады, және олар автоматты түрде сізге білінбей жасалып көбейе береді.  Интернетке шыққан сайын, GPS-ы бар смартфонмен жүрген кезде, әлеуметтік желіде достарыңызбен байланыста немесе чатта болғанда және сіз кімсіз, қайдансыз, қай салада, қандай компанияда  жұмыс істейсіз, қай дүкеннен қандай зат аласыз, қай жеріңіздің ауырады, кіммен қарым-қатынастасыз, қандай сайттарға кіресіз, смартфоныңызда қандай қосымша бағдарламалар (apps) қолданасыз, отбасыңыз, мінез-құлқыңыз т.б. бәрін тізіліп, талданып сақтала береді. Интернеттің барлық беттеріндегі мәліметтер де «Big data». Олар Google-дің, Facebook-тің және тағы басқа алыптардың серверлерінде тұр, оған арнайы органдардың қолы жететіндігіне күмән жоқ. Сіз әртүрлі әлеуметтік желілер, қосымша бағдарламалардағы анкеталарды толтыру арқылы ол мәліметтерді жинауға өзіңіз көмектесіп жатырсыз. Google-ден бір сөзге іздеу салсаңыз, соның жарнамасы келесі бетте тұратынын байқаған шығарсыз. Содан-ақ сізді не қызықтыратынын біледі. «Big data»-дағы мәліметтер жиынтығы тек қана Лауһул Махфузға жетпейтін шығар.

Сонымен қатар, адамның емес ақылды құрлығы, машиналар да мәліметтердің көбеюіне үлес қосады. Олар бір-бірімен немесе үйдегі серверлер арқылы мәлімет алмасады. Үлкен зауыттардағы өндірістегі жабдықтардың көпшілігіне сенсорлар орнатылған, олар да бір-біріне мәліметтер жіберіп тұрады.

«Big Data» термині осы барлық мәліметтерді жинауға және соны адамзаттың өз мүддесіне әртүрлі салаларда қолдану қабілеттілігіне қатысты айтылады.

«Big Data» қалай жұмыс істейді?

«Big Data» мынадай принциптермен жұмыс істейді: бір мәселе, не бір жағдай туралы неғұрлым көп білсеңіз, соғұрлым сіз сенімді идеялар таба аласыз, әрі қарай не болатынын болжай аласыз.

Көп мөлшердегі мәліметтерді салыстыру, бұрын белгісіз болып келген жайттарды анықтауға, соңынан салмақты шешім қабылдауға мүмкіндік береді.  Көбінесе бұл жинақталған мәліметтердің негізінде жасалған моделдеу арқылы іске асырылады. Сол модель арқылы жағдайды имитациялап, берілген процесстердің шамаларын реттеу арқылы оңтайлы нәтижелерді көздейді. Бұндай процесстер автоматтандырылған.

Бұл орасан зор мәліметтерді жинау, анықтау, сұрыптау, саралау және өңдеу оңай шаруа емес, ол жасанды интеллекті мен машинамен оқыту арқылы іске асады. Жалпы «мәліметтерге» фотосуреттер, видео, аудиожазбалар, мәтіндер, мәліметтер базасы, сенсорлардың түскен көрсетілімдер және т.б. жатады.

Big data қалай қолданылады?

Толассыз өсіп жатқан осы мәліметтер ағынын қазір біз осыдан біраз жыл бұрын ғана мүмкін болмаған әдістер арқылы өз қажетімізге жарата аламыз.  Бұл әртүрлі саладағы бизнес әлеміне төңкеріс әкеледі, компаниялар өздерінің клиенттерінің қай сегментте, қандай тауарға сұраныс болатынын өте үлкен дәлдікпен болжай алады. Big Data сонымен қатар компанияларға өздерінің іс-қимылдарын әлдеқайда тиімді жасауға мүмкіндік береді.

Бизнестен тыс Big Data біздің өмірімізді әртүрлі жолдармен өзгертуге көмектеседі:

Медицинада өте үлкен дәрігерлік жазбаларды сараптау мен моделдеу арқылы ауруларды бастапқы кезеңінде анықтап және жаңа дәрілердің түрін жасауға мүмкіндік береді. Әртүрлі сенсорлардан келетін мәліметтерді жинап, саралау арқылы табиғи және техногендік аппатарды, жер сілкінуін алдын – ала болжап, дер кезінде шара қолдануға жағдай жасайды. Сонымен қатар соғыс жайындағы босқындарды бақылап, қорғауға, полиция күштерінің стратегиясын жасауға, күштерді дұрыс қолдануға, сол арқылы қылмыстардың алдын алуға көмектеседі.

Big Data туғызатын мәселелер

Big Data бізге бұрын түске де кірмеген идеялар мен мүмкіндер силай отырып, шешуін іздейтін мәселелерді де  жүктейді:

 

Мәліметтердің конфиденциалдылығы. Жасалынып жатқан Big Data-ның ішінде біздің жеке өміріміз жайлы ақпараттар өте көп және олардың негізгі бөлігінің конфиденциалдылығын сақтауға біздің құқығымыз бар. Біз ыңғайлылық үшін персоналдық мәліметтерді ашамыз. Дегенмен, персоналдық мәліметтерді ашу мен ыңғайлылықтың балансын табуымыз керек. Мәліметтерді қорғау. Мысалы біз банкілерге онлайн банкинг қолдану үшін өзіміз жайында ақпарттарды береміз, бірақ олар қаншалықты қауіпсіз жағдайларда сақталады?

Егер мәліметтер кездейсоқ ашылып қалса, сол арқылы біреулердің ықпалына түсіп, дискриминацияға түсіп қалу қауіпі де жоқ емес.

Болашаққа қарасақ

Өмірімізді адам танымастай өзгеркен Big Data бүгін осындай болса, ертең не болмақшы? Мәліметтер көбейе береді, сараптау жүйелері технологиясы әрі қарай дами береді.

Бизнестің Big Data-ны қолдану қабілеті өте жоғары болуы шарт. Оны өздерінің стратегиялық активі ретінде қарастырған бизнестер ғана қалып, алдыға дамиды.

Қазақстанда электрон цифрлық қолтаңба форматы өзгерді
30 сәуір 2024
Қазақстанда электрон цифрлық қолтаңба форматы өзгерді

30 сәуірде Қазақстан криптографиялық стандартқа көшеді, оған сәйкес электрон цифрлық қолтаңба форматы өзгереді, деп хабарлайды Ulys ҚР Ұлттық куәландырушы орталығына сілтеме жасап.

Өзгерістер бойынша, ЭЦҚ-ның бір кілтіне көшу, яғни жеке және заңды тұлғаларға ҚР СТ МЕМСТ Р 34.10 – 2015 (МЕМСТ 2015) алгоритмінде ЭЦҚ-ның бір кілті беріледі, ол аутентификация үшін де, қол қою үшін де пайдаланылады.

Заңды тұлғалардың пайдалануына арналған ЭЦҚ кілттерінің мынадай талап етілмеген түрлерін қолжетімді тізімнен алып тастау жоспарланған:

"Қаржылық құжаттарға қол қою құқығы бар қызметкер";

"Кадр бөлімінің қызметкері".

"Жаңа МЕМСТ 2015 алгоритмін қолдау жаңартылған NCALayer арқылы қамтамасыз етіледі. Жаңа нұсқа шыққаннан кейін, қолданба автоматты түрде пайдаланушыға NCALayer жаңартуды ұсынады", - делінген хабарламада.

ӘЛЕМДЕГІ ТҰҢҒЫШ DIGITAL МЕМЛЕКЕТ
04 қаңтар 2019
ӘЛЕМДЕГІ ТҰҢҒЫШ DIGITAL МЕМЛЕКЕТ

Биыл қыркүйек айында жерінің аумағы картадан көрінбейтін жаңа мемлекет өз жұмысын бастайды. Оның болмысы Біріккен Ұлттар Ұйымында (БҰҰ) ресми тіркелген, халықаралық қауымдастық  мойындаған 193 мемлекеттің құрылымынан мүлде бөлек болмақ. Ресми атауы – The Good Country, ана тілге аударсақ - Жақсы Мемлекет (Good Country). Әлемдегі тұңғыш Digital мемлекет. Территориясы, Үкіметі және Конституциясы жоқ жаңа құрылым халық саны бойынша Қытай мен Үндістаннан кейінгі үшінші алып ел болады деген болжам бар. Бұл қаншалықты шындыққа жанасады? Осы және көкейдегі өзге де көп сауалға жауап алу мақсатымен жобаның авторы, саяси кеңесші Саймон Анхолтқа (Simon Anholt) хабарластық.

  • Саймон мырза, жақында Жақсы Мемлекеттің азаматтығын алдым. Сіз бастаған қозғалысқа қосылуымның өз себебі бар. Ал, Сізді Digital дербес Mемлекет құруға не итермеледі?

 

  • 2014 жылдан жай ғана Идея, TED talk алаңындағы Дискуссия және Индекс ретінде қаралған жоба бүгінде виртуалды мемлекетке айналды. Мен бұл бастаманы жақсы мемлекет құру үшін емес, әлемдегі бүгінгі жағдайды жақсартуға ықпал ететін күшті іске қосу үшін қолға алдым. Ғаламдық жылыну, көші-қон, терроризм, құлдық, табиғаттың ластануы, қақтығыстар, жемқорлық, кедейшілік пен теңсіздік сынды халықаралық мәселелерді мемлекеттер бірлесе отырып, жүйелі түрде шешетін болса, оның тиімділігі ұлттық әрі ұлтаралық деңгейде де арта түсер еді. The Good Country жобасы осы принципті күшейтеді деп сенемін.

 

  • Мақсат айқын болғанымен, оның орындалуы күмән тудырады. Жалғыздың шаңы шықпас деген бар... Білуімше, The Good Country-дің негізін қалаушылардың тағы бірі әлеуметтанушы Мэдлин Хьюг (Madeline Hug). Ауқымды жобаның артында Сіздерден басқа тағы кім тұр?

 

  • Әрине, шаруа ауқымды. Бірақ, жобаны қолға алмас бұрын Good Country-ге миллиондаған халықтан қолдау боларына сендім. Осыдан төрт жыл бұрын әріптесім Доктор Роберт Говерс (Robert Govers) екеуіміз құндылықтары ортақ, мәселен, өзіне тек өз ұлтының өкілі ғана емес, алдымен адамзат баласының мүшесі ретінде қарайтын; бәсекеден  гөрі бірлескен әрекетті қолдайтын; әртүрлі ұлт өкілдерін тілі мен ділі, түрі мен болмысы бөлек деп бөліп-жармайтын: жаһанданудың аларынан берері мол екеніне сенетін адамның санын анықтау үшін әлеуметтік зерттеу жүргіздік. Әлемдегі ересек халықтың 83%-ы қатысқан сауалнаманың нәтижесіне сай, оның 13%-ы, бұл дегеніңіз 700 миллионға жуық адам, жоғарыда аталған құндылықтарды ұстанады. Оларды «табиғи космополиттер» деп атауға болады және ондай адамдар әлемнің түкпір-түкпірінде жүр. Мақсат сол адамдардың басын қосу және қолдаушыларымыз солар болмақ. Мәселен, «табиғи космополиттер»-дің 11 миллионы Мексиканы мекен етсе, 80 миллионы АҚШ-та тұрады екен. The Good Country тұрғындарының алды солар болмақ.

 

  • Демек, жоғарыда аталған ғаламдық мәселелерге немқұрайлы қарамайтын әлемдегі кез келген адам The Good Country-дің азаматтығын ала алады. Мен жобаның сайты Good Country арқылы оның жұмысымен, сонда көрсетілген шарт бойынша 5 АҚШ доллар болатын, біздіңше 1 800 теңгенің айналасы, жылдық салықты төлеп жаңа елдің азаматы атандым. Қалтаға салмақ салмайтын қаржы болғанымен де оны көтере алмайтындарды жоққа шығаруға болмайды. Жалпы, сіз бастаған қозғалысқа қосылудың шарты қандай?

 

  • The Good Country-дің азаматы болу үшін ешқандай емтихан тапсырудың қажеті жоқ. Жас мөлшері 14 жастан жоғары болса болғаны және кез келген елдің «табиғи космолиттері» қатарымызға қосыла алады. Ұлттандыру -  бұл құндылықтары және өмірлік көзқарасы сәйкес адамдарды біріктіруге бағытталған web-негізіндегі процесс. Бұл танысу алаңына көп ұқсайды. Ал, егер бәз біреудің азаматтық алу үшін 5 доллары болмаса, жылдық салықтан босату туралы өтініш бере алады. Азаматтық алғандардың қолдауымен жұмыс істейтін арнайы қор бар, төлей алмайтындар сол қордың есебінен қатарымызға қосыла алады. Біз жыл соңына дейін 200 000 адамды қабылдауды жоспарлап отырмыз. Бұл digital ұлттың алғашқы легі 2019 жылы қаралуы тиіс алғашқы үш актуалды мәселені анықтап, оларды тиімді шешудің амалдарын талқылауды бастайды. 2019 жылдың қыркүйек айында барлығы біз ойлағандай болса азаматтарды тұрақты түрде тіркеуді жолға қоямыз да, қатарымызды 700 миллионға жеткізу жұмыстарын бастаймыз.    

 

  • Әрине, ауқымды жобаның жұмыс істеу тәртібін бір мақаламен түсіндіріп жеткізу мүмкін емес. Десе де, сіз ойлағандай азаматтың саны тіркеліп, солардың есебінен қорға қаржы түскеннен кейін атқарылатын шаруаны қысқа қайырып өтесіз бе? Бюджеті жоқ құрылымның қызметі қалай жүзеге асырылмақ?

 

  • Әрқайсысы жылына 5 АҚШ доллары көлемінде салық төлейтін, саны  миллиард тұрғынның төрттен үшіне жететін алып ұлттың халықаралық қауымдастықтың іс-әрекетіне айтарлықтай ықпал етуге қауқарлы боларына күмән жоқ. Ықпал етудің жолдары бірнеше, мысалы, The Good Country халықаралық басқарудың заманға сай жаңа жүйесін  әзірлейтін болады; жоба мемлекеттермен, қалалармен, корпорациялармен, халықаралық агенттіктермен және басқа да ойыншылармен бірлесе жұмыс істеудің жаңа және тың жолдарын іске қосады; кез келген жағдайды ішкі және сыртқы деп бөліп жармай қабылданған шешімнің тиімділігі жоғары болатынан айғақтайтын заңдарды әзірлейтін болады; уақыт өте келе Digital мемлекет экономикалық қуат алған күндері халықаралық аренадағы ойыншыларды «дамудың дұрыс жолдарын» таңдауға ынталандырады және ұлт басшылары мен тұрғындарды халықаралық қарым-қатынастың үздік амалдарына оқыту жұмыстарын жүргізеді.

 

  • The Good Country-дің миссиясы мен функциясы, бір қарағанда, БҰҰ-ның атарып отырған жұмысына көп келеді. Оның баламасына көп ұқсайды. БҰҰ-мен бірлесе әрекет ету көзделген бе, жалпы жаңа мемлекеттің аталған ұйым қызметінен қандай айырмашылығы бар?

 

  • Біздің азаматтар өздері қалайтын өзгерістерге қатысты заң жобасын өздері талқылап және оны жүзеге асырудың жолдарын әзірлеу процесіне тікелей қатысатын болады. Remesh технологиялық әріптесімізбен арадағы келісім бойынша, оның көмегімен тұрғындар күрделі және өзекті мәселелерге қатысты пікірталас жүргізуге мүмкіндік алады. Бұл тарихта бұрын соңды болмаған өте маңызды жүйе. Бүгінгі дәсүрлі үкіметтер не «көшбасшылар» жасап отырған бюрократияны жоюдың жолдарын тәжірибеде сынақтан өткізетін боламыз. The Good Country өзін-өзі басқаратын үлкен жүйе құруды көздеп отыр. Жаңа мемлекеттің жұмысын арнайы шағын азаматтық қызмет реттейді және заңдардың орындалуын қамтамасыз ететін дипломатиялық корпусы болады. Ал, мемлекеттермен, қалалармен және БҰҰ-ы агенттіктерімен ресми дипломатиялық қарым-қатынас орнатудың амалдарын қазірден қарастырып жатырмыз.
  • Қандай да болмасын мемлекетті басқарушы органсыз елестету мүмкін емес. Әлемдегі тұңғыш виртуалды мемлекеттің басшысы кім және үкіметті қалыптастыру жоспарда бар ма?

 

  • The Good Country үкіметсіз жұмыс істейтін тұңғыш мемлекет болады. AI (Artificial Intelligence) технологиясына рақмет айтуымыз қажет, жаңа ел өз тұрғындарының басқаруымен қызмет жасайтын, өзін-өзі ұйымдастыруға қабілетті жүйе түрінде қызмет атқарады. Виртуалды мемлекет өзге де мемлекеттермен бірлесе жұмыс істей отырып, оларға халықаралық проблемалармен бірлесе күресудің тиімділігін дәлелдеуді көздейді. Шекарасымен емес өмірлік құндылықтарымен анықталатын тұңғыш мемлекет жұмысын бастады. Жақсы мемлекет құруға деген адамзаттың құштарлығы мен энтузиазмі бізге бұл идеяны жүзеге асыруға ниетті адамның көп екенін көрсетті. Демек, әлемдік дамуды дұрыс жолға бағыттайтын қосымша күшті іске қосатын оңтайлы сәт бұл.

 

  • Мазмұнды сұхбатыңызға көп рақмет!

Бақыт ШОЙЫМБЕК, халықаралық журналист,

Ғаламдық Коммуникацияны Басқару саласының Магистрі (Ұлыбритания),

The Good Country жобасының Қазақстандағы елшісі

 

 

 

Біз туралы
ulys.kz — ақпараттық, сараптамалық және танымдық бағыттағы материалдарды береді.
 
Мультимедиялық жоба заман талабына сай жасалған. Қазақстанның ақпараттық нарығын сапалы
контентпен қамтамасыз етуге үлес қосуға бағытталған. Мұндағы сараптамалық, танымдық
мақалалар сан саланы қамтиды. Геостратегия, геоэкономика, геосаясат, халықаралық
қатынастар мен елдің ішкі-сыртқы саясаты, экономика, жаһанда болып жатқан тектоникалық
өзгерістер мен тренд тақырыптар ұлттық мүдде тұрғысынан терең талданып қазақ
оқырмандарына жеткізіледі. Орталық Азия мен Түркі әлеміне ерекше көңіл бөлінеді.