16–23 ماۋسىم كۇندەرى بولگاريا استاناسى سوفيادا وتكەن يۋنيورلار اراسىنداعى الەم چەمپيوناتى مارەسىنە جەتتى. اتالعان جارىسقا 7 سپورتشىمىز قاتىسىپ، تاريحي ناتيجەگە قول جەتكىزدى.

اتاپ ايتقاندا، اقمارال ەرەكەشيەۆا ءۇش باعدارلامادا فينالعا شىعىپ، دوپ جانە لەنتا جاتتىعۋلارىندا التىن، شىعىرشىق جاتتىعۋىندا كۇمىس مەدال جەڭىپ الدى. وسىلايشا، جەرلەسىمىز تاريحي جەتىستىككە قول جەتكىزدى. بۇعان دەيىن جەرلەستەرىمىزدىڭ ەڭ ۇزدىك ناتيجەسى – 4-ورىن بولاتىن.

وليمپيادا چەمپيوندارىمەن شەبەرلىك بايقاستى

16–23 ماۋسىم كۇندەرى يندونەزيانىڭ بالي قالاسىندا وتكەن سەمسەرلەسۋدەن سارى قۇرلىق باسەكەسىندە ۇلتتىق قۇراما سپورتشىلارى ءبىر كۇمىس، ءبىر قولا مەدال جەڭىپ الدى. كوماندالىق سايىستا قازاقستان قۇراماسى الەمدەگى كوشباسشىلاردىڭ ءبىرى، وليمپيادا چەمپيونى جاپونيا قۇراماسىمەن سىنعا ءتۇسىپ، 24:45 ەسەبىمەن قارسىلاس جەڭىسكە جەتتى.

كوماندا ساپىندا رۋسلان كۋربانوۆ، ەرلىك سەرتاي، ەلمير ءالىمجانوۆ، ۆاديم شارلايموۆ، كيريلل پروحودوۆ ونەر كورسەتتى.

ايتا كەتەيىك، جارىس بارىسىندا قازاقستان قۇراماسى 1/16 كەزەڭدە تۇرىكمەنستاننان، كەيىن سينگاپۋردان، جارتىلاي فينالدا قىتايدان باسىم ءتۇستى. وسىعان دەيىن چەمپيوناتتا ۆاديم شارلايموۆ جەكەلەي سىندا قولا جۇلدەگەر اتانعان ەدى.

تاشكەنتتەگى جارىستا 3 سپورتشىمىز تۇعىر ساتىسىنا كوتەرىلدى

18–21 ماۋسىمدا وزبەكستاننىڭ تاشكەنت قالاسىندا وتكەن سپورتتىق گيمناستيكادان Challenge Cup جارىسىندا ۇلتتىق قۇرامانىڭ 3 سپورتشىسى تۇعىر ساتىسىنا كوتەرىلدى.

قوسسىرىق جاتتىعۋىنىڭ فينالىندا يلياس ازيزوۆ كۇمىس (13.100 ۇپاي)، تاعى ءبىر وتانداسىمىز دميتريي پاتانين قولا جۇلدەگەر (12.700 ۇپاي) اتاندى. بۇل جاتتىعۋدا جارىس قوجايىنى اكرورحون تەمىرحونوۆ 13.550 بالل جيناپ، توپ جاردى.

ال ايەلدەر اراسىندا بورەنە جاتتىعۋىندا كوركەم ەربوسىن قىزى فينالدا ۇزدىك ۇشتىكتى تۇيىندەدى. وتانداسىمىز 12.100 بالل الىپ، Challenge Cup جارىسىنداعى العاشقى جۇلدەسىن موينىنا تاقتى.

قازاقستان گرەك-ريم كۇرەسىنەن ازيا چەمپيوناتىندا توپ جاردى

2025 جىلعى 18–21 ماۋسىم كۇندەرى ۆۋنگتاۋ قالاسىندا (ۆەتنام) وتكەن 23 جاسقا دەيىنگى سپورتشىلار اراسىنداعى ازيا چەمپيوناتىندا وتاندىق پالۋاندار 6 التىن (ەراسىل مامىربەكوۆ، يسحار قۇربايەۆ، باعدات ساباز، اقجان ىقىلاسوۆ، ماييس الييەۆ، ۆيكتوريا حۋساينوۆا)، 6 كۇمىس (ماقسات سايلاۋ، يۋسۋف ماسييەۆ، دجوحار ۋزاروۆ، مەرەي بازاربايەۆ، ەلنار شىلدەباي، نۇرداۋلەت بەكەنوۆ، ) جانە 7 قولا مەدال (دياس قالتاي، نۇرداۋلەت سەيىلبەكوۆ، اسحاب حادجييەۆ، ءالىمجان ءسالىمجان، زەينەپ بايانوۆا، انگەلينا پەرۆۋحينا، تىنىس دۋبەك) جەڭىپ الدى. اسىرەسە، گرەك-ريم كۇرەسىنىڭ وكىلدەرى ۇزدىك ناتيجە كورسەتىپ، جالپىكوماندالىق ەسەپتە توپ جاردى.

ستەللا سۋحانوۆانىڭ ءبىر ءوزى ازيا چەمپيوناتىندا 4 التىن مەدال جەڭىپ الدى

تايلاندتىڭ رايونگ قالاسىندا بايداركا مەن كانوەدە ەسكەك ەسۋدەن 18 بەن 23 جاس ساناتىنداعى ازيا چەمپيوناتى ءوتتى. سارى قۇرلىق باسەكەسىندە U23 ساناتىندا ۇلتتىق قۇراما سپورتشىلارى سىنعا ءتۇسىپ، 6 التىن (دەنيس كلەنين، ستەللا سۋحانوۆا، دميتريي حولموگوروۆ، ەگور كراسنونوس)، 6 كۇمىس (ءانۋار الماعامبەتوۆ، ولگا سۋرمينا، ماريا بروۆكوۆا، دميتريي حولموگوروۆ، ەگور كراسنونوس، دەنيس كلەنين، دميتريي لاديۋكوۆ، ولگا سۋرمينا، ماريا بروۆكوۆا، ۆيكتوريا فالالەيەۆا، تاتيانا گلادكوۆا) جانە 3 قولا مەدالمەن (نۇرجان مۋفۋقۇل ۇلى، ءانۋار الماعامبەتوۆ) جالپى ەسەپتە 2-ورىنعا تۇراقتادى.

بيىلعى چەمپيوناتقا 16 مەملەكەتتەن 270 سپورتشى قاتىستى. قازاقستان 18 بەن 23 جاس ساناتىن قوسقاندا بارلىعى 12 التىن، 12 كۇمىس، 7 قولا جۇلدە يەلەندى.

الەكساندر بۋبليك گاللە ءتۋرنيرىنىڭ ەكى دۇركىن چەمپيونى اتاندى

قازاقستاننىڭ ءبىرىنشى، الەمنىڭ 45-راكەتكاسى الەكساندر بۋبليك گەرمانيانىڭ گاللە قالاسىندا وتكەن ATP 500 ءتۋرنيرىنىڭ جەڭىمپازى اتاندى. فينالدا ول الەمنىڭ 11-راكەتكاسى، رەسەيلىك دانييل مەدۆەديەۆتى جەڭدى – 6:3، 7:6 (7:4). وسىلايشا، بۋبليك سپورتتىق جولىندا ATP تۋرنيرلەرىندەگى بەسىنشى تيتۋلىنا قول جەتكىزدى. سونىڭ ىشىندە ول ەكىنشى رەت گاللە (2023) دوداسىندا ۇزدىك شىعىپ وتىر.

يتاليانىڭ تۋرين قالاسىندا ءوتىپ جاتقان قىسقى ۋنيۆەرسيادادا فريستايل-موگۋلدان قازاقستاندىق اناستاسيا گورودكو چەمپيون اتاندى، دەپ حابارلايدى Ulys ۇلتتىق وليمپيادا كوميتەتىنە سىلتەمە جاساپ.

فينالعا ءبىرىنشى ورىنمەن شىققان ا.گورودكو ەڭ جوعارى ۇپايمەن (79،79) التىن مەدالعا يە بولدى.

جاپونيالىق حارۋكا ناكاو 76،29 بالمەن ەكىنشىورىنعا يە بولدى.

گەرمانيالىق حاننا ۆەسسە (75،04 بالل) ۇزدىك ۇشتىكتى تۇيىندەدى.

قىسقى ۋنيۆەرسيادانىڭ اشىلۋ سالتاناتىندا تۋ ۇستاپ شىققان اياۋلىم امىرەنوۆا بۇل باسەكەدە 70،52 بالمەن بەسىنشى ورىنعا تابان تىرەدى.

ايتا كەتەيىك، قىسقى ۋنيۆەرسيادادا بۇگىن قازاقستاندىق جاستار ءۇش سپورت تۇرىنەن سىنعا تۇسۋدە.

اۆتور: ulys.kz ءتىلشىسى

«PGL» — بۇل جاي عانا ءۇش ءارىپ ەمەس. بۇل — الەمدىك دەڭگەيدەگى شايقاس الاڭى. بۇل — مىڭداعان جانكۇيەردىڭ كوز الدىندا، ميلليونداعان كورەرمەننىڭ الدىندا ءوز ەلىڭنىڭ اتىنان شىعاتىن، تەك مىقتىلاردىڭ مەكەنى. بيىل بۇل ساحناعا العاش رەت قازاق كيبەرسپورتشىلارى جولداما الۋى مۇمكىن. سەبەبى، CS2 KZ 2025 Community Cup ءتۋرنيرى وسىنداي مۇمكىندىك بەرىپ وتىر.

ەرتەڭ، 26 ساۋىردە، وتاندىق ويىنشىلار ءۇشىن اسا ماڭىزدى كۇن. بۇل — رەسپۋبليكالىق اۋقىمداعى ىرىكتەۋ كەزەڭدەرىنىڭ سوڭعى كۇنى. ءبىر اي بويى ءار سەنبى سايىن 166 كوماندا، ياعني 800-گە جۋىق ويىنشى Counter-Strike 2 الاڭىندا تەر توكتى. ەندىگى كەزەكتە 3–4 مامىردا پلەي-وفف، ال 15 مامىردا استاناداعى The Hood كلۋبىندا LAN-فينال وتپەك.

بۇل — ءبىر قاراعاندا جاي عانا جارىس ەمەس. بۇل — ۇلكەن ارمانعا جول اشاتىن كوپىر. ويتكەنى، باس جۇلدە – PGL Astana 2025 ساحناسىنا شىعۋ. جەڭىمپاز كوماندا سول جەردە الەمنىڭ ەڭ مىقتىلارىمەن يىق تىرەستىرىپ، 5 VIP-ورىن يەلەنەدى. بۇل — بۇرىن-سوڭدى قازاقستاندا بولماعان جاعداي.

Qazaq Cybersport Federation پرەزيدەنتى قۋانىشبەك ەسەكەيەۆتىڭ ايتۋىنشا، بۇل ءتۋرنيردىڭ باستى ماقساتى – جاستارعا تەك ويىن ەمەس، مۇمكىنشىلىك بەرەتىن پلاتفورما جاساۋ.
«PGL — بۇل قازاقستاننىڭ كيبەرسپورت كارتاسىنداعى ورنىنىڭ نىعايعانىن كورسەتەتىن وقيعا. ءبىزدىڭ ويىنشىلارعا الەمدىك دەڭگەيگە شىعۋعا جول اشىپ، وتاندىق جانكۇيەرلەرگە NAVI، G2 Esports، Astralis سىندى كوماندالاردى ءوز كوزدەرىمەن كورۋگە مۇمكىندىك بەرەدى. قازاقستان CS2-دە ءارقاشان مىقتى بولعان. ەندى سول مىقتىلىقتى الەم ساحناسىندا دالەلدەيتىن ۋاقىت كەلدى»، – دەيدى ول.

ەڭ قىزىعى، تۋرنيرگە قاتىسۋشىلارعا جاي عانا ساحنا ەمەس، ناقتى قولداۋ دا كورسەتىلۋدە. فيناليستەردىڭ جولاقىسى مەن تۇرۋى تولىقتاي Winline كومپانياسىنىڭ قولداۋىمەن قامتاماسىز ەتىلەدى. ال ەكىنشى ورىندى يەلەنگەن كوماندا 5 ستاندارتتى بيلەتكە يە بولادى. توپ-4 قۇرامىنا كىرگەندەردىڭ بارلىعى گەيمەرلىك قۇرىلعىلارمەن ماراپاتتالادى.

ال PGL Astana 2025 ءتۋرنيرى شە؟ بۇل جاي عانا جارىس ەمەس. بۇل — S-Tier ساناتىنا جاتاتىن، Valveء-دىڭ رەسمي تىزىمىنە كىرەتىن بەدەلدى تۋرنير. 16–18 مامىردا Barys Arena ساحناسىندا وتەتىن فينالدىق باسەكەدە الەمنىڭ 16 ۇزدىك كومانداسى ب ا ق سىناسادى. NAVI، Team Spirit، Virtus.pro... ءتىزىم ۇزاق، اتاعى بيىك.
ەڭ باستىسى — بۇل ءتۋرنيردىڭ جۇلدە قورى – 1 250 000 اقش دوللارى. CS2 تاريحىنداعى رەكوردتىق كورسەتكىش.

بالكىم بۇل جارىس بىرەۋدىڭ ءومىرىن وزگەرتەدى. بالكىم، بۇل قازاقستانداعى جاڭا ءداۋىردىڭ باستالۋى. بۇرىن ەل نامىسىن بوكستان، كۇرەستەن، شاحماتتان قورعاپ جۇرگەندەر ەدى. ەندى — CS2. ەندى — كيبەرسپورت. ەندى — استانا.