پرەزيدەنت State Power Investment Corporation كومپانياسى باسشىسىن قابىلدادى

ساياسات

29 ناۋرىز 2024

پرەزيدەنت State Power Investment Corporation كومپانياسى باسشىسىن قابىلدادى

مەملەكەت باسشىسى State Power Investment Corporation كومپانياسى ديرەكتورلار كەڭەسىنىڭ ءتوراعاسى ليۋ مينشەندى قابىلدادى، دەپ حابارلايدى اقوردا.

پرەزيدەنت قحر-عا جۇمىس ساپارى اياسىندا State Power Investment Corporation (SPIC) كومپانياسى ديرەكتورلار كەڭەسىنىڭ ءتوراعاسى ليۋ مينشەنمەن كەزدەسۋ وتكىزدى.

اڭگىمەلەسۋ بارىسىندا ەنەرگەتيكا سالاسىنداعى ىنتىماقتاستىقتى ودان ءارى دامىتۋ، سونىڭ ىشىندە جاڭارتىلاتىن ەنەرگيا كوزدەرىنە نەگىزدەلگەن سەرىكتەستىك پەرسپەكتيۆاسى تالقىلاندى.

قاسىم-جومارت توقايەۆقا China Power International Holding ەنشىلەس كومپانياسىنىڭ قازاقستاندا بەلسەندى جۇمىس ىستەپ جاتقانى جونىندە مالىمەت بەرىلدى. سوڭعى بەس جىلدا جاڭاتاستا جەل ەنەرگياسى جوباسى جۇزەگە اسىرىلىپ، قاراعاندىدا كۇن ەلەكتر ستانسياسى سالىندى.

قىتايدىڭ ەڭ ءىرى ەنەرگەتيكالىق كومپانيالارىنىڭ ءبىرى سانالاتىن SPIC كورپوراسياسىنىڭ باسشىسى جامبىل جانە پاۆلودار وبلىستارىندا جالپى قۋاتى 1 گۆت بولاتىن جەل ەلەكتر ستانسيالارىن سالۋعا قاتىستى جاڭا ينۆەستيسيالىق جوبالاردىڭ جۇزەگە اسىرىلۋ بارىسى جونىندە باياندادى. بۇل جوبالارعا ءبىر ميلليارد دوللاردان استام ينۆەستيسيا سالىنعان.

سونداي-اق ليۋ مينشەننىڭ ايتۋىنشا، كومپانيا قازاقستاندا اۋقىمدى گيدروەنەرگەتيكالىق جوبالار مەن بۋ-گاز تۋربينالارىن سالۋ پەرسپەكتيۆاسىن زەرتتەۋگە نيەتتى.

پرەزيدەنت ەلىمىزدىڭ جاڭارتىلاتىن ەنەرگيا سالاسىنا ۇزدىك حالىقارالىق تەحنولوگيالار مەن تاجىريبەلەردى ەنگىزۋگە مۇددەلى ەكەنىن اتاپ ءوتتى.

كەزدەسۋ سوڭىندا قاسىم-جومارت توقايەۆ ليۋ مينشەندى بيىل ماۋسىم ايىندا وتەتىن استانا حالىقارالىق فورۋمىنا قاتىسۋعا شاقىردى.

RELATED NEWS

ساياسات

12 ءساۋىر 2025

قازاقستاننىڭ ءۇش قالاسىنا ەرەكشە مارتەبە بەرىلمەك

تمد سىرتقى ىستەر مينيسترلەرى كەڭەسىنىڭ وتىرىسىندا استانا، الماتى، قاراعاندى «1941-1945 جج. ەڭبەك داڭقى قالاسى» قۇرمەتتى اتاعىن بەرۋ تۋرالى شەشىم كەلىسىلدى، دەپ حابارلايدى بۇل تۋرالى ءسىم حابارلادى.

كەزدەسۋدە قازاقستان پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ تمد ۇيىمىن ودان ءارى دامىتۋعا باعىتتالعان ءبىرقاتار ۇسىنىستى ورتاعا سالدى. وسى تۇرعىدا قازاقستان باستامالارىن جۇزەگە اسىرۋدا دوستاستىق بويىنشا سەرىكتەستەردىڭ قولداۋى ەرەكشە اتالىپ ءوتتى.

«ەلىمىزدىڭ ۇسىنىسى بويىنشا بۇگىنگى تاڭدا ۆولونتورلەر فورۋمى، دوستاستىق جارمەڭكەسى، تمد اكادەميالىق استاناسى جانە باسقا دا كوپتەگەن جوبا بىرلەسكەن كۇش-جىگەردىڭ ارقاسىندا ىسكە اسىرىلىپ جاتىر نەمەسە جاقىن بولاشاقتا وتكىزۋگە جوسپارلانعان»، – دەپ مالىمدەدى سىرتقى ىستەر ءمينيسترى.

جەڭىستىڭ 80 جىلدىعى قارساڭىندا تمد ەلدەرىنىڭ ءبىرقاتار قالاسىنا، سونىڭ ىشىندە استانا، الماتى، قاراعاندى جانە باسقا دا قالالارعا «1941-1945 جج. ەڭبەك داڭقى قالاسى» قۇرمەتتى اتاعىن بەرۋ تۋرالى شەشىم كەلىسىلدى.

سىرتقى ىستەر مينيسترلەرى كەڭەسىنىڭ كەلەسى وتىرىسى 2025 جىلعى قازان ايىندا تمد مەملەكەت باسشىلارى ءسامميتى قارساڭىندا دۋشانبە قالاسىندا وتەدى.

ساياسات

28 ءساۋىر 2025

اقوردادا قونايەۆ جانە الاتاۋ قالالارىن دامىتۋ ماسەلەلەرى ايتىلدى

مەملەكەت باسشىسى الماتى وبلىسىنىڭ اكىمى مارات سۇلتانعازييەۆتى قابىلدادى. قاسىم-جومارت توقايەۆقا الماتى وبلىسىنىڭ 2025 جىلدىڭ ءبىرىنشى توقسانىنداعى الەۋمەتتىك-ەكونوميكالىق دامۋى تۋرالى ەسەپ بەرىلدى. بۇل تۋرالى اقوردا حابارلايدى.

مارات سۇلتانعازييەۆ ەكونوميكانىڭ نەگىزگى سەكتورلارىندا ءوسىم بايقالاتىنىن باياندادى. اتاپ ايتقاندا، ونەركاسىپتىك ءوندىرىس كولەمى 507،9 ميلليارد تەڭگەنى، اۋىل شارۋاشىلىعى ءونىمى 97،4 ميلليارد تەڭگەنى قۇراعان. شاعىن جانە ورتا بيزنەس سۋبەكتىلەرىنىڭ سانى 146،2 مىڭعا جەتىپ، 7،7 پايىزعا ارتقان.

پرەزيدەنتكە جىل باسىنان بەرى 12 جاڭا ونەركاسىپ جوباسىنىڭ ىسكە قوسىلعانى تۋرالى مالىمەت بەرىلدى. ونىڭ ىشىندە «GALANZ bottlers» ءوندىرىس الاڭىنىڭ كەڭەيۋى، «بارتوعاي گەس-28» جانە شارىن وزەنىندەگى شاعىن گەس كاسكادىنىڭ قۇرىلىستارى سياقتى اۋقىمدى جوبالار بار. جالپى، وڭىردە قۇنى 2،4 تريلليون تەڭگەنى قۇرايتىن 122 جوبا جۇزەگە اسىرىلىپ جاتىر. ناتيجەسىندە 36 776 جۇمىس ورنى اشىلادى.

مەملەكەت باسشىسىنا قونايەۆ جانە الاتاۋ قالالارىن دامىتۋ بارىسى جونىندە ايتىلدى. جاڭا باس جوسپارعا سايكەس، وبلىس ورتالىعىندا «Smart Qonaev» قالانى باسقارۋدىڭ ءبىرىڭعاي جۇيەسى ەنگىزىلۋدە. الاتاۋ قالاسىنىڭ باس جوسپارىنا تۇزەتۋلەر جاساۋ جانە كولىك-ينجەنەرلىك ينفراقۇرىلىمدى جوبالاۋ جۇمىستارى باستالدى.

وبلىس اكىمىنىڭ ايتۋىنشا، «جايلى مەكتەپ» ۇلتتىق جوباسى اياسىندا 17 ءبىلىم ورداسىنىڭ قۇرىلىسى قولعا الىنعان. بۇدان بولەك، وڭىردەگى ءۇش اۋىسىمدى وقۋ ماسەلەسىن شەشۋ ءۇشىن مەملەكەت-جەكەمەنشىك ارىپتەستىك نەگىزىندە 19 مەكتەپ سالۋ جوسپارلانعان. 2025-2027 جىلدارى 91 وقۋ وشاعىندا كۇردەلى جوندەۋ جۇمىستارى جۇرگىزىلەدى.

مەملەكەت باسشىسى قونايەۆ جانە الاتاۋ قالالارىن، جالپى الماتى اگلومەراسياسىن دامىتۋعا قاتىستى بارلىق بەلگىلەنگەن ماقساتتاردى ساپالى ءارى ۋاقتىلى ورىنداۋدىڭ ماڭىزىن اتاپ ءوتتى. پرەزيدەنت يندۋستريالدى ايماقتار مەن اlatau اەا-نىڭ الەۋەتىن نىعايتۋعا، سونداي-اق كوممۋنالدىق جانە ەلدى مەكەندەردەگى جولداردىڭ قۇرىلىسىنا باسا ءمان بەرۋدى تاپسىردى.

ساياسات

30 قىركۇيەك 2024

توقايەۆ: پرەزيدەنت – حالىق جالداعان مەملەكەتتىك قىزمەتكەر

ق ر پرەزيدەنتى قاسىم-جومارت توقايەۆ «ەۋرازيا كەڭىستىگىندەگى ورنىقتى دامۋ جانە قاۋىپسىزدىك» كونفەرەنسياسىنا قاتىستى، دەپ حابارلايدى اقوردا.

پرەزيدەنت ءوز سوزىندە بۇرىن-سوڭدى بولماعان گەوساياسي تۇراقسىزدىق جاعدايىندا ديپلوماتيا شەشۋشى رولگە يە بولعانىن اتاپ ءوتتى.

– گەوساياسات پەن گەوەكونوميكاداعى تۇبەگەيلى وزگەرىستەر، جاھاندىق دەڭگەيدەگى كليماتتىق جانە دەموگرافيالىق سىن-قاتەرلەر، پاندەميانىڭ جاڭا ءقاۋپى، قارۋلانۋ باسەكەسىنىڭ ءورشي ءتۇسۋى، تەحنولوگيالىق پروگرەسس، سونىڭ ىشىندە جاساندى ينتەللەكتىنى ەنگىزۋ جاعدايىندا ستراتەگيالىق تۇراقتىلىق پەن ورنىقتى دامۋ ماسەلەلەرى بارشامىز ءۇشىن وزەكتى بولا ءتۇستى. بۇدان شىعاتىن قورىتىندى انىق: حالىقارالىق قوعامداستىق سىندارلى ديالوگقا تىڭ سەرپىن بەرۋى ءۇشىن كۇن تارتىبىنە وڭ وزگەرىس جاساۋى قاجەت. سوندىقتان ءبىرتۇتاس ەۋرازيالىق قاۋىپسىزدىك يدەياسى كوپپوليارلى، ادىلەتتى جانە ورنىقتى الەمدىك ءتارتىپتى قالىپتاستىرۋعا تۇجىرىمدامالىق نەگىز بولا الادى، – دەدى قاسىم-جومارت توقايەۆ.

مەملەكەت باسشىسى كونفەرەنسيا قاتىسۋشىلارىنا قوعامدىق ءومىردىڭ بارلىق سالاسىندا جۇزەگە اسىرىلىپ جاتقان قازاقستانداعى اۋقىمدى وزگەرىستەر جونىندە مالىمەت بەردى.

قاسىم-جومارت توقايەۆتىڭ پىكىرىنشە، ساياسي رەفورمالاردىڭ ەڭ باستى جاڭالىعى – كونستيتۋسيادا پرەزيدەنت مانداتىن 7 جىلدىق ءبىر مەرزىممەن شەكتەۋ تۋرالى ەرەجەنىڭ بەكىتىلۋى.

– مۇنداي نورما پوستكەڭەستىك ەلدەردىڭ، ءتىپتى ودان تىسقارى مەملەكەتتەردىڭ ەشقايسىسىندا جوق. مەنىڭ ويىمشا، پرەزيدەنتتى ءبىر رەت جەتى جىلعا سايلاۋ – ونىڭ سايلاۋالدى باعدارلاماسى مەن رەفورمالارىن جۇزەگە اسىرۋعا جەتكىلىكتى ۋاقىت. وعان قوسا پرەزيدەنت – حالىق جالداعان مەملەكەتتىك قىزمەتكەر. ەلىمىزدە زاڭ مەن ءتارتىپ ۇستەمدىك قۇرۋعا ءتيىس ەكەنىنە سەنىمدىمىن. تەك سوندا عانا رەفورمالاردى جۇزەگە اسىرۋعا، سونداي-اق قازاقستان ەكونوميكاسىنا ينۆەستيسيا تارتۋعا قاجەتتى جاعداي جاساي الامىز. زاڭ مەن ءتارتىپ – ادىلەتتى قازاقستاننىڭ نەگىزى. ادىلدىككە قاشان دا، قاي جەردە دە مۇقتاجدىق بار. ءبىزدىڭ ەلدە دە سولاي. قولعا العان رەفورمالاردى ىسكە اسىرۋ قانشالىقتى قيىن بولسا دا، دىتتەگەن ماقساتىمىزعا جەتپەي قويمايمىز. ونى ەشكىم توقتاتپاق تۇرماق، باعىتىنان جاڭىلدىرا المايدى، – دەدى مەملەكەت باسشىسى.

قاسىم-جومارت توقايەۆ قازاقستان مەن رەسەي حالىقتارى اراسىنداعى دوستىق بايلانىستاردى نىعايتۋدا ءبىلىم سالاسىنىڭ ماڭىزى زور ەكەنىن اتاپ ءوتتى. پرەزيدەنتتىڭ ايتۋىنشا، ءقازىر رەسەيدە 60 مىڭنان استام قازاقستاندىق ستۋدەنت وقيدى.

– بۇگىندە ەلىمىزدە رەسەيدىڭ تانىمال جوعارى وقۋ ورىندارىنىڭ فيليالدارى تابىستى جۇمىس ىستەپ كەلەدى. قازاقستاندا ماسكەۋ مەملەكەتتىك حالىقارالىق قاتىناستار ينستيتۋتىنىڭ فيليالىن اشۋ جوسپارلانىپ وتىر، – دەدى قاسىم-جومارت توقايەۆ.

پلەنارلىق وتىرىستا رەسەي پرەزيدەنتىنىڭ كومەكشىسى ۆلاديمير مەدينسكيي كونفەرەنسيا قاتىسۋشىلارىنا ۆلاديمير ءپۋتيننىڭ سالەمىن جەتكىزدى.

ماسكەۋ مەملەكەتتىك حالىقارالىق قاتىناستار ينستيتۋتىنىڭ رەكتورى اناتوليي توركۋنوۆ وقۋ ورنىنىڭ 80 جىلدىعىنا وراي وسىناۋ ءىس-شارانى ۇيىمداستىرعانى ءۇشىن قازاقستان تاراپىنا العىس ايتتى.

– ءبىز كونفەرەنسيا تاقىرىبىن كەزدەيسوق تاڭداعان جوقپىز. مۇنىڭ اياسىندا ەكونوميكا جانە قاۋىپسىزدىك سالاسىنداعى كوپجاقتى ىنتىماقتاستىقتىڭ ءداستۇرلى ماسەلەلەرى كليماتتىق كۇن تارتىبىندەگى جاڭا سىن-قاتەرلەرمەن، سونداي-اق ەۋرازيا كەڭىستىگىندە ەنەرگەتيكا جانە كولىك ينفراقۇرىلىمىن دامىتۋدىڭ جاي-جاپسارىمەن بىرگە قارالدى، – دەدى اناتوليي توركۋنوۆ.

جيىنعا قازاقستان مەن رەسەيدىڭ كورنەكتى عالىمدارى، ديپلوماتيالىق قىزمەت ارداگەرلەرى، مەملەكەتتىك ورگاندار مەن مەكەمەلەردىڭ باسشىلارى، ساياساتتانۋشىلار جانە جاستار ۇيىمدارىنىڭ وكىلدەرى قاتىستى.

جاڭالىقتار

25 قاراشا 2025