قازاقتا «وڭ قولىم بەرگەندى، سول قولىم بىلمەسىن» دەگەن تاماشا ءتامسىل بار. قازىرگى كەزدە بۇل ءتامسىل ءوزىنىڭ قۇنىن تۇسىرە باستاعانداي. بەرگەنىن ايتپاۋدى سۇرايتىن، بەرگەن ساداقاسى تەك ءبىر جاراتۋشىنىڭ ريزاشىلىعى ءۇشىن عانا ەكەندىگىن ايتاتىن جومارت ادامدار بار. كوپكە توپىراق شاشۋعا بولمايدى دەسەك تە ءسال جاقسىلىعى ءۇشىن جۇرتتان ءىلتيپات العىسى كەلەتىندەر دە بار. الەۋمەتتىك جەلى مەن اقپاراتتىق تەحنولوگيالاردىڭ كوز لەستىرمەي دامۋى، كوپتەگەن ادامنىڭ جەكە ءومىرىنىڭ كوپشىلىككە جاريالى بولۋىنا كەڭ جول اشىپ وتىر. كەدەي-كەپشىككە، جوق-جىتىككە ءبىر ءۇزىم نان بەرسە دە ونى الەۋمەتتىك جەلىگە جاريالاپ، وسىنداي جاقسىلىق جاساپ جاتىرمىن دەپ جۇرتتان لايك جينايتىن ادامدار جەتەرلىك.
جالپى كەدەي-كەپشىكتى رەنجىتپەۋ، جۇرتتىڭ كوزىنشە ونى ىڭعايسىز جاعدايعا تۇسىرمەۋ ءۇشىن ساداقانى باسقالاردان جاسىرىپ بەرگەن دۇرىس قاعيدا. ول تۋرالى دىنىمىزدە دە ايتىلادى.
اشىق ساداقادان جاسىرىن ساداقانىڭ ساۋابى كوپ دەيدى Ulys تىلشىسىنە ءۋاليحان يمام.
«ساداقا تۋرالى ايتقان كەزدە قوجا احمەت ياسساۋي وقيعاسى تۋرالى مىسالدى كەلتىرگەن دۇرىس بولادى. باياعىدا ءبىر كىسى قوجا احمەت ياسساۋيگە كەلىپ، مەن ساداقا بەرەيىن ءبىراق ساۋابى كوپ بولۋى ءۇشىن كىمگە بەرەيىندەپ سۇراق قويادى.(سۇرايدى ماعان ساداقا بەرسەم ساۋابى كوپ بولاتىن، كىمگە بەرسەم بولادى دەيدى.) سوندا ۇستاز كەدەيگە بەر - 10 ساۋاپ. ول كىسى جوق ول از دەيدى. جەتىمگە بەر- 100 ساۋاپ. ول دا از دەيدى. تۋىسقانىڭا بەر دەيدى 1000 ساۋاپ دەيدى، اتا-اناڭا بەر 10 000 ساۋاپ. ول دا از دەيدى. قۇران ۇيرەنگەن شاكىرتتەرگە بەرسە شەكسىز ساۋاپ دەيدى. سونداي-اق پايعامبارىمىز ءوز حاديسىندە: جومارت – حالىققا، جۇماققا، اللا تاعالاعا جاقىن، ءبىراق توزاقتان الىس. ساراڭ – حالىقتان، جۇماقتان، اللا تاعالادان الىس، ءبىراق توزاققا جاقىن» دەگەن. سول سياقتى، نادان جومارت – ساراڭ عالىمنان قاراعاندا اسا ۇلى اللاعا سۇيكىمدى»، - دەدى ءۋاليحان ۇستاز.
