بۇگىن - كوكتەمنىڭ جارقىن مەرەكەسى ۇلىستىڭ ۇلى كۇنى ناۋرىز مەيرامى. جىل وتكەن سايىن ناۋرىز مەيرامى ەلىمىزدى مەكەندەگەن بۇكىل حالىقتىڭ، ۇلت پەن ۇلىستىڭ ساعىنىپ كۇتەتىن ورتاق مەرەكەسىنە اينالىپ، جاڭا مازمۇنمەن، جاراسىمدى سان-سالتاناتىمەن تۇرلەنە تۇسۋدە.
مەملەكەت باسشىسىنىڭ باستاماسىمەن ناۋرىز مەيرامى بيىل قازاقستاندا جاڭا فورماتتا تويلانۋدا. ەلىمىزدىڭ ءار ايماعىندا ناۋرىزدىڭ 14ء-ى مەن 23ء-ى ارالىعىندا ءسالت-داستۇرىمىزدىڭ قۇندىلىقتارىن دارىپتەۋگە باعىتتالعان ناۋرىزناما ونكۇندىگى ءوتىپ جاتىر.
ناۋرىز مەيرامى - كوكتەم مەيرامى جانە ورتالىق ازيا حالىقتارىنىڭ جاڭا جىلى. بۇل مەرەكە بىرنەشە مىڭ جىلدان بەرى اتالىپ كەلەدى. پارسىشا «ناۋرىز» ءبىرىنشى ايدىڭ ءبىرىنشى كۇنى دەگەندى بىلدىرەدى. بۇل ايدى سوعدالىقتار «ناۋسارىز»، حورەزمدىكتەر «ناۋساردجي»، ارمياندار «ناۆاساردي»، چۋۆاشتار «نوراس-وياحە» دەپ اتاعان. قازاقستاندا كەڭەس زامانىندا تالاي جىلدار بويى ءدىني مەرەكە دەپ سانالىپ، تىيىم سالىندى. سوڭعى رەت 1926 جىلى تويلانعان ناۋرىز مەيرامى قازاقستاندا 1990 جىلداردىڭ باسىندا قايتادان رەسمي تۇردە اتالا باستادى. 2001 جىلى ناۋرىز مەيرامى مەملەكەتتىك مەرەكە رەتىندە جاريالاندى.
كۇن مەن ءتۇننىڭ تەڭەلىپ، جان-دۇنيەنى تىرىلتكەن، شارۋانىڭ ءبىر مالى ەكەۋ بولىپ، ارقا-باسى كەڭىپ، اققا اۋزى تيگەن، قىتىمىر قىستىڭ ىزعارىنان قۇتىلىپ، الداعى شۋاقتى كۇندەردەن ۇمىتتەندىرگەن ناۋرىز مەرەكەسى تاۋەلسىز ەلىمىزدىڭ زور ىقىلاسپەن تويلاناتىن ناعىز حالىقتىق سيپاتتاعى سالتاناتىنا اينالدى. ق ر تۇڭعىش پرەزيدەنتى نۇرسۇلتان نازاربايەۆتىڭ جارلىعىمەن 2010 جىلدان بەرى قازاقستاندا ناۋرىز مەيرامى ءۇش كۇن بويى تويلانىپ كەلەدى. بىرىككەن ۇلتتار ۇيىمى باس اسسامبلەياسىنىڭ قارارىمەن 2010 جىلى ناۋرىز حالىقارالىق مەيرام مارتەبەسىنە يە بولدى.
ناۋرىز مەيرامى اياسىندا مىندەتتى تۇردە اتقارىلاتىن راسىمدەر بارشىلىق. ماسەلەن، ناۋرىز كوجە دايىندالادى، اپالارىمىز قىسقى سوعىمنىڭ ابدەن سۇرلەنگەن قادiرلi مۇشەلەرiن وسى كۇنi قازانعا سالادى. سوعىمعا سويىلعان مالدىڭ باسى نەمەسە شەكەسى قوسىلىپ، قازى-قارتا، جال-جايا قازانعا تۇسەدى. ەت سورپاسىنا كوجە قايناتادى. وعان تارى، ارپا، بيداي، بۇرشاق، كۇرىش سياقتى جەتى ءتۇرلى ءدان مەن اق قوسادى. تۇز بەن سۋدى قوسقاندا ءدامنىڭ سانى توعىز بولۋى ءتيىس. تۇركى حالقىنىڭ ۇعىمىندا جەتى مەن توعىز جانە قىرىق - اسا كيەلى ساندار. سول سەبەپتى ناۋرىز كوجە اسا قاسيەتتى تاعام بولىپ سانالادى. وعان قوسا، ول - توقشىلىق پەن ىرىس-قۇتتىڭ جورالعىسى. ناۋرىز مەرەكەسى جادىراعان جازدى قارسى الار كوكتەمنىڭ باسى بولعاندىقتان، ونى قازاقتار «سامارقاننىڭ كوك تاسى جىبىگەن كۇن» دەپ تە اتايدى. بۇل بۇكىل تابيعات انانىڭ توڭى ءجىبىپ، جانى كىرەتىن تىرشىلىك باسى دەگەندى بىلدىرەدى.
