مەملەكەت باسشىسى گەرمانيا فەدەرالدىق كانسلەرى ولاف شولسپەن كەڭەيتىلگەن قۇرامدا كەلىسسوز جۇرگىزدى، دەپ حابارلايدى اقوردا.
قاسىم-جومارت توقايەۆ پەن ولاف شولس رەسمي دەلەگاسيا مۇشەلەرىنىڭ قاتىسۋىمەن كەڭەيتىلگەن قۇرامدا كەلىسسوز وتكىزدى.
پرەزيدەنت كانسلەردىڭ ەلىمىزگە جاساعان العاشقى رەسمي ساپارىنىڭ ءمانى زور ەكەنىن اتاپ ءوتىپ، بۇگىنگى كەزدەسۋ قازاقستان مەن گەرمانيانىڭ كوپقىرلى ىنتىماقتاستىعىن جاڭا دەڭگەيگە كوتەرەتىنىنە سەنىم ءبىلدىردى.
– ءبىز جاڭا عانا شاعىن قۇرامدا ەكىجاقتى قارىم-قاتىناستى ودان ءارى نىعايتۋ ماسەلەسىن تالقىلادىق. ساۋدا-ەكونوميكا، ينۆەستيسيا سالالارىنداعى ىقپالداستىقتى تەرەڭدەتۋگە ەرەكشە نازار اۋدارىلدى. بۇدان بولەك، وزەكتى حالىقارالىق ماسەلەلەر تۋرالى ءسوز قوزعادىق. اتاپ ايتقاندا، قازىرگى گەوساياسي احۋالعا، جاھاندىق قاۋىپسىزدىككە جانە ايماقتىق دامۋعا، كليماتتىڭ وزگەرۋىنە قاتىستى پىكىر الماستىق. سونداي-اق حالىقارالىق ۇيىمدار اياسىنداعى ىقپالداستىق ماسەلەسىن قاراستىردىق. ەكىجاقتى قارىم-قاتىناستار ستراتەگيالىق سەرىكتەستىك رۋحىندا دامىپ كەلەدى. بۇگىنگى كەلىسسوزدەر ونىڭ اياسىن كەڭەيتە تۇسۋگە ىقپال ەتەتىنىنە سەنىمدىمىن، – دەدى قاسىم-جومارت توقايەۆ.
مەملەكەت باسشىسىنىڭ ايتۋىنشا، گەرمانيا قازاقستاننىڭ نەگىزگى ساۋدا سەرىكتەستەرىنىڭ ءبىرى جانە ەكونوميكامىزعا ينۆەستيسيا سالعان جەتەكشى ەلدەردىڭ ساناتىنا كىرەدى.
– بىلتىر ەكىجاقتى تاۋار اينالىمى 1،5 ەسەدەي ءوسىپ، 4 ميلليارد دوللارعا جۋىقتادى. بيىل دا وڭ ديناميكا بايقالىپ وتىر. سوڭعى جەتى ايدا ءوزارا ساۋدا-ساتتىق كولەمى 2،3 ميلليارد دوللاردان استى. 2005 جىلدان بەرى گەرمانيادان شامامەن 6،7 ميلليارد دوللار كولەمىندە تىكەلەي ينۆەستيسيا تارتىلدى. بۇل قارجىنىڭ 90 پايىزى شيكىزاتتىق ەمەس سەكتورعا تيەسىلى ەكەنى قۋانتادى. بۇگىندە قازاقستاندا نەمىس كاپيتالىنىڭ ۇلەسى بار مىڭنان استام كومپانيا جۇمىس ىستەيدى،– دەدى پرەزيدەنت.
ءوز كەزەگىندە گەرمانيانىڭ فەدەرالدىق كانسلەرى قازاق جەرىندە كورسەتىلگەن سىي-قۇرمەت ءۇشىن قاسىم-جومارت توقايەۆقا العىس ايتىپ، ەكىجاقتى بايلانىستاردىڭ قارقىندى دامىپ كەلە جاتقانىنا توقتالدى.
– ءسىزدىڭ ەلىڭىزگە تىكەلەي ينۆەستيسيا سالۋ جانە ساۋدا اينالىمىنىڭ كولەمىن ارتتىرۋ ءۇشىن ەكونوميكالىق بايلانىستارىمىزدى جاقسارتۋعا بارلىق جاعدايدى جاسايمىز. ارينە، ەكونوميكالىق ىنتىماقتاستىقتى بارلىق سالادا دامىتقىمىز كەلەدى. ەنەرگەتيكا سالاسىنداعى سەرىكتەستىگىمىز دايەكتى تۇردە العا جىلجىپ كەلە جاتقانىنا ءدان ريزامىز. ەكى ەل اراسىندا سەنىمدى ءارى جۇيەلى ىنتىماقتاستىق ورناعان. بۇل – بۇكىل الەمگە جاقسى ۇلگى. سونداي-اق ءبىزدىڭ الدىمىزدا تۇرعان حالىقارالىق سىن-قاتەرلەر توڭىرەگىندە جان-جاقتى پىكىر الماسقانىمىزعا قۋانىشتىمىز، – دەدى ولاف شولس.
تاراپتار ءوزارا ءتيىمدى ساۋدا-ەكونوميكالىق ىنتىماقتاستىقتى ارتتىرۋعا، اسىرەسە، ەنەرگەتيكا، «جاسىل» ترانسفورماسيا، تاۋ-كەن ونەركاسىبى، كولىك-لوگيستيكا، كليماتتى قورعاۋ، ەكولوگيا جانە اۋىل شارۋاشىلىعى سالالارىنداعى ىقپالداستىقتى كۇشەيتۋگە مۇددەلى ەكەنىن راستادى. سونداي-اق قازاق-گەرمان مادەني-گۋمانيتارلىق بايلانىستارىن نىعايتۋ پەرسپەكتيۆاسى قاراستىرىلدى.
كەلىسسوزدەر قورىتىندىسى بويىنشا پرەزيدەنت قاسىم-جومارت توقايەۆ پەن فەدەرالدىق كانسلەر ولاف شولس قازاقستان رەسپۋبليكاسى مەن گەرمانيا فەدەراتيۆتىك رەسپۋبليكاسى اراسىنداعى ىنتىماقتاستىق تۋرالى بىرلەسكەن دەكلاراسيا قابىلدادى.
.jpg)
سونىمەن قاتار رەسمي دەلەگاسيا مۇشەلەرى مىناداي قۇجاتتارعا قول قويدى:
1. قازاقستان رەسپۋبليكاسىنىڭ ۇلتتىق بانكى مەن دويچە بۋندەسبانك اراسىنداعى ورتالىق بانكتەر ىنتىماقتاستىعىنىڭ تەحنيكالىق ماسەلەلەرى جونىندەگى ءوزارا تۇسىنىستىك تۋرالى مەموراندۋم؛
2. قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى مەن گەرمانيا فەدەراتيۆتىك رەسپۋبليكاسىنىڭ فەدەرالدىق سىرتقى ىستەر مينيسترلىگى اراسىنداعى د.سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتى جانىنان قازاقستان-نەمىس عىلىم جانە تەحنولوگيالار ينستيتۋتىن قۇرۋ جونىندەگى نيەت تۋرالى مەموراندۋم؛
3. قازاقستان رەسپۋبليكاسىنىڭ وقۋ-اعارتۋ مينيسترلىگى، «سامۇرىق-قازىنا» ۇلتتىق ءال-اۋقات قورى» اكسيونەرلىك قوعامى مەن «ۆوزروجدەنيە» قازاقستاندىق نەمىستەر بىرلەستىگى» قوعامدىق قورى جانە گەرمانيا فەدەراتيۆتىك رەسپۋبليكاسىنىڭ فەدەرالدىق سىرتقى ىستەر مينيسترلىگى اراسىنداعى قازاق-نەمىس مەكتەبىن قۇرۋ نيەتى تۋرالى مەموراندۋم.
