تجم داعدارىس ورتالىعىندا ۆيسە-پرەمەر – سۋ تاسقىنىنا قارسى شارالاردى ۇيلەستىرۋ جانە قارعىن سۋ ءجۇرۋ كەزەڭىنىڭ سالدارىن جويۋ جونىندەگى رەسپۋبليكالىق شتاب باسشىسىنىڭ ورىنباسارى قانات بوزىمبايەۆ پەن توتەنشە جاعدايلار ءمينيسترى شىڭعىس ءارىنوۆتىڭ قاتىسۋىمەن كەڭەس ءوتتى. بۇل تۋرالى ۇكىمەتتىڭ باسپا ءسوز قىزمەتى حابارلايدى.
3 ساۋىردەگى جاعداي بويىنشا ەلدەگى سۋ تاسقىنىنا قاتىستى احۋال ءالى دە كۇردەلى. 6 وڭىردە 1 364 جەكە مەنشىك تۇرعىن ءۇيدى سۋ باسقان. اۆتوجولداردىڭ 105 ۋچاسكەسىندە سۋ جايىلعان. 78 جول ۋچاسكەسىندە بۇلىنگەن جەرلەردى جانە 4 كوپىردى قالپىنا كەلتىرۋ جۇمىستارى جۇرگىزىلىپ جاتىر. 64 ەلدى مەكەنگە كولىك قاتىناسى جوق، ولارعا ازىق-تۇلىك پەن دارى-دارمەك جەتكىزىلۋدە.
سۋ باسقان ايماقتاردان تۇرعىنداردى ەۆاكۋاسيالاۋ تاۋلىك بويى جۇرگىزىلىپ جاتىر. سوڭعى تاۋلىكتە قۇتقارۋشىلار 1 524 ادامدى، ونىڭ ىشىندە 496 بالانى ەۆاكۋاسيالادى.
وبلىستاعى سۋ ايدىندارىندا مۇز كەپتەلىسىن بولدىرماۋ ءۇشىن مۇز جارۋ جۇمىستارى جۇرگىزىلۋدە.
سۋ تاسقىنىنا قاتىستى احۋالدى باعالاۋ ءۇشىن 1-3 ءساۋىر ارالىعىندا ۆيسە-پرەمەر مەن توتەنشە جاعدايلار ءمينيسترى قاراعاندى، قوستاناي جانە اقمولا وبلىستارىنىڭ اۋماعىن اۋەدەن بارلادى.
بۇگىن ارشالى، سەلينوگراد اۋداندارى مەن قوسشى قالاسىنىڭ اۋماعى زەرتتەدى، سونداي-اق پرەوبراجەنسكيي سۋ تورابىنا باردى.
قازىرگى ۋاقىتتا وبلىستا قار جامىلعىسى شامامەن 76% قۇرايدى. تجم كۇشتەرى مەن قۇرالدارىن سەلينوگراد، ارشالى، اتباسار، ساندىقتاۋ اۋداندارىنىڭ، كوكشەتاۋ جانە قوسشى قالالارىنىڭ 17 ەلدى مەكەنىنە ءبولۋ ۇيىمداستىرىلدى.
قاراعاندى وبلىسىنىڭ اۋماعىندا قار جامىلعىسى شامامەن 34% قۇرايدى. وبلىستا الدىن الۋ ءىس-شارالارى، ونىڭ ىشىندە جاعالاۋدى نىعايتۋ جۇمىستارى جانە قاپشىقتاردى توسەۋ جۇمىستارى جۇرگىزىلۋدە. بارلىعى 700-گە جۋىق ادام جانە 118 بىرلىك تەحنيكا جۇمىلدىرىلدى. ءقازىر جاعداي تۇراقتى.
قوستاناي وبلىسى بويىنشا قار جامىلعىسى شامامەن 71%. 75 تۇرعىن ءۇي مەن 38 اۋلا اۋماعىن سۋ باسقان. اتالعان ەلدى مەكەندەرگە ءتجم-نىڭ شىعىس قازاقستان، قاراعاندى جانە قىزىلوردا وبلىستارىنان بارعان قوسىمشا كۇشتەرى مەن قۇرالدارى تارتىلدى، جاعالاۋدى نىعايتۋ جۇمىستارى جۇرگىزىلىپ جاتىر.
ءقازىر ارقالىق قالاسى مەن امانگەلدى اۋدانىندا جاعداي تۇراقتالدى. جانگەلدى اۋدانىندا جاعداي ءالى كۇردەلى. اكىمدىك بارلىق قاجەتتى شارالاردى قابىلداۋدا.
وڭىرلەردە شىعىندى باعالاۋ بويىنشا جۇمىستار باستالدى. تاۋلىك بويى مونيتورينگ جۇرگىزىلۋدە. الداعى كۇندەرى ەلىمىز بويىنشا جاۋىن-شاشىن جانە تەمپەراتۋرالىق فوننىڭ كۇرت كوتەرىلۋى كۇتىلۋدە، بۇل قاردىڭ قارقىندى ەرۋىنە اكەلەدى.
كەڭەس قورىتىندىسى بويىنشا رەسپۋبليكالىق شتاب باسشىسىنىڭ ورىنباسارى وڭىرلەردىڭ اكىمدىكتەرىنە قاۋىپسىزدىكتى قامتاماسىز ەتۋ، سۋ باسقان ايماقتاردان ادامداردى الدىن الا ەۆاكۋاسيالاۋ جانە قۇتقارۋ جونىندە قاجەتتى شارالار قابىلداۋ تۋرالى ءتيىستى تاپسىرمالار بەردى.
