ەكۆادور مافياسى پرەزيدەنت جاريالاعان توتەنشە جاعدايعا جاۋاپ رەتىندە بۇكىل ەلدە تارتىپسىزدىكتەر مەن قاقتىعىستار ۇيىمداستىردى. ەسىرتكى كارتەلىنىڭ مۇشەلەرى تىكەلەي ەفيردە تەلەارنانى باسىپ الىپ، بىرنەشە پوليسيا قىزمەتكەرىن كەپىلگە الدى، تۇرمەلەردە بۇلىك شىعاردى. بۇل تۋرالى ۆۆس اقپارات تاراتتى.
جاڭا پرەزيدەنت دانيەل نوبوا سەيسەنبى كۇنى 22 مافيالىق توپتى لاڭكەستىك ۇيىم دەپ اتاپ، ەلدە ىشكى قارۋلى قاقتىعىس ءجۇرىپ جاتقانىن ايتتى.
ءبىر كۇن بۇرىن تۇرمەدەن مافيالىق توپتاردىڭ ءبىرىنىڭ جەتەكشىسى جوعالىپ كەتكەننەن كەيىن پرەزيدەنت نوبوا ەلدە توتەنشە جاعداي جاريالادى. توتەنشە جاعداي پوليسيا مەن اسكەريلەرگە كەڭەيتىلگەن وكىلەتتىلىكتى، قوعامدىق جيىندارعا تىيىم سالۋدى جانە كومەندانتتىق ساعاتتى قامتاماسىز ەتەدى.
ەكۆادورداعى الەۋمەتتىك جەلى قولدانۋشىلارى سەيسەنبى كۇنى كوشەلەردەگى قارۋلى ادامداردى، ورتەنگەن كولىكتەردى، ءتىپتى جارىلىستاردىڭ ۆيدەولارى مەن فوتوسۋرەتتەرىن جاريالادى.
سوڭعى ناقتى مالىمەت بويىنشا پوليسيا قاقتىعىستار كەزىندە 10 ادامنىڭ قازا تاپقانىن حابارلادى.
تەلارنانى باسىپ الۋ
سەيسەنبى كۇنى بەتپەردە كيگەن ءبىر توپ قارۋلى ادام تىكەلەي ەفير كەزىندە گۋاياكيل پورتىنداعى تس تەلەستۋدياسىنا باسىپ كىردى. ولار تەلەارنا قىزمەتكەرلەرىنە ەدەنگە جاتۋدى بۇيىردى. كادر سىرتىندا اتىس پەن ايقاي ەستىلدى.
كوپ ۇزاماي تىكەلەي ەفير ءۇزىلدى. ارتىنشا قارۋلانعان ادامدار تەلەارنا عيماراتىنان شىعىپ، ءبىراز ۋاقىتتان كەيىن پوليسيا ولاردىڭ بارلىعى قاماۋعا الىنعانىن ايتىپ، ەدەندە قولدارى بايلانعان ادامداردىڭ سۋرەتتەرىن جاريالادى.
ەكۆادور پوليسياسىنىڭ باسشىسى سەزار ساپاتا جۋرناليستەرگە 13 ادامنىڭ ۇستالعانىن، ولاردان بىرنەشە اتىس قارۋى، ەكى گراناتا مەن جارىلعىش زات تابىلعانىن ايتتى.
پوليسيانىڭ حابارلاۋىنشا، تەلەارنانىڭ بارلىق قىزمەتكەرلەرى امان.
پوليسيا مەن اسەريلەرگە شابۋىل
ەكۆادور جانە حالىقارالىق ءباسپاسوزدىڭ حابارلاۋىنشا، دۇيسەنبى جانە سەيسەنبى كۇندەرى ەلدىڭ ءار ايماعىندا، ونىڭ ىشىندە ەل استاناسى كيتودا جەتى ەكۆادور پوليسياسىنىڭ قىزمەتكەرى كەپىلگە الىنعان.
كۋەنكا قالاسىندا بەلگىسىز بىرەۋلەر اسكەري جۇك كولىگىنە قولدان جاسالعان بومبا لاقتىرعان. پوليسيانىڭ حابارلاۋىنشا، ەسمەرالدا پروۆينسياسىندا ءۇش رەت جارىلعىش زات قولدانىلعان.
ەكۆادوردىڭ تاعى بىرنەشە جەرىندە جارىلىس بولدى.
بىرنەشە قالادا قاراقشىلار كولىكتەردى ورتەپ جىبەردى. سونىمەن بىرگە كيتودا پوليسيا وتقا ورانعان ءبىر كولىكتەن گاز باللوندارىن تاپتى، قىلمىسكەرلەر ولاردى جارىلۋى مۇمكىن دەپ كۇتكەن بولۋى مۇمكىن.
تۇرمەدەگى تارتىپسىزدىكتەر
ەكۆادوردىڭ 24 پروۆينسياسىنىڭ التاۋىنداعى تۇرمەلەردە تارتىپسىزدىكتەر بولدى، كەيبىر جاعدايلاردا كۇزەتشىلەر كەپىلگە الىندى، دەپ حابارلادى ەكۆادور تۇرمە باسشىلىعى SNAI.
ارنايى پوليسيا مەن اسكەري جاساقتار ەل ورو، لوحا، چيمبوراسو، سوتوپاشي، اسۋاي جانە پيچينچا پروۆينسيالارىنداعى تۇرمەلەردەگى تارتىپسىزدىكتەردى باسۋعا ءماجبۇر بولدى. ارتىنشا اسكەريلەر تۇرمە اۋلالارىندا ساربازداردىڭ قورشاۋىندا تۇرعان جارتىلاي جالاڭاش تۇتقىنداردىڭ سۋرەتتەرىن جاريالادى.
پرەزيدەنت نوبوا تۇرمەدەگى تارتىپسىزدىكتەر - ونىڭ تۇزەۋ مەكەمەسىن باقىلاۋعا الۋ ارەكەتىنە مافيانىڭ رەاكسياسى ەكەنىن ايتتى.
بۇلىك نەدەن باستالدى
وتكەن جىلدىڭ قازان ايىندا ەكۆادورداعى پرەزيدەنت سايلاۋىندا جەڭىسكە جەتكەن دانيەل نوبوا ەلدە ورىن العان قىلمىس تولقىنىن اۋىزدىقتاۋعا ۋادە بەردى.
ەكۆادور ۇزاق ۋاقىت بويى ءوزارا شيەلەنىستەرى بار ەكى ءىرى كوكاين ءوندىرۋشى ەل - كولۋمبيا مەن پەرۋدىڭ ورتاسىندا تىرشىلىك ەتىپ كەلە جاتقان تىنىش ارال. ءبىراق سوڭعى جىلدارى ەسىرتكى مافياسىنىڭ توپتارى بۇل ەلدە دە كۇشەيدى.
ەكۆادوردا كىسى ءولتىرۋ كورسەتكىشى 2018-2022 جىلدار ارالىعىندا ءتورت ەسەگە ءوستى. 2022 جىلى 17 ميلليون حالقى بار ەلدە 7800 ادام قازا تاپتى. سول جىلى پوليسيا 220 توننا ەسىرتكى تاركىلەدى.
تۇرمەلەردەگى قاندى قاقتىعىستار بولەك ماسەلەگە اينالدى: 2021 جىلدىڭ اقپان ايىنان بەرى 460-تان استام تۇتقىن قازا تاپتى.
بريتاندىق Financial Times گازەتى جازعانداي، مافيا ەكۆادوردا 2007-2017 جىلدار ارالىعىندا بيلىك ەتكەن سولشىل پرەزيدەنت رافاەل كوررەا تۇسىندا تامىر الا باستادى. ونىڭ تۇسىندا بيلىك تىنىق مۇحيتىنداعى ەكۆادور پورتتارى ارقىلى ەسىرتكى تاسىمالىنا كوز جۇما قارادى.
