Túrkıanyń astanasy Ankara qalasynda atalǵan eldiń joǵary oqý oryndarynda bilim alyp jatqan qazaqstandyq jastar arasynda fýtboldan jarys ótti. «Rýhanı Jańǵyrý» memlekettik baǵdarlamasy aıasynda ári Qazaqstandaǵy Jastar jylyna oraı Anadolydaǵy qazaq jastarynyń basyn qosqan sporttyq sharany Qazaqstannyń Túrkıadaǵy Elshiligi uıymdastyrdy.
Qazaqstannyń Túrkıadaǵy Elshiliginiń feısbýktegi resmı paraqshasynda jarıalaǵan aqparatqa súıensek, Ankarada Qazaqstan jastary arasynda uıymdastyrylǵan fýtbol jarysyna Ankara, Ystambul, Izmır, Býrsa, Kastamoný, Konıa, Karabýk, Kaıserı, Sakarıa jáne Eskıshehır qalalarynyń jetekshi ýnıversıtetterinde bilim alyp jatqan 300-ge jýyq jas qatysqan. Olardyń basym kóbi stýdentter bolǵanymen, aralarynda magıstranttar men doktoranttar da bar.
Teńbil dop dodasynyń ashylý saltanatynda sóz sóılegen Qazaqstannyń Túrkıadaǵy Elshisi Abzal Saparbekuly ótken jyldyń qazan aıynda Elbasy Nursultan Nazarbaevtyń Qazaqstan halqyna Joldaýynda 2019 jyldy Jastar jyly dep jarıalaýdy usynǵanyn eske sala kele: «Memleketimiz sizderge úlken úmit artyp otyr. Elbasy Nursultan Nazarbaev atap ótkendeı, jastar elimizdiń básekege qabilettiliginiń mańyzdy faktory. Búgingi tańda tek memleketter arasynda ǵana emes, adamdar arasynda da básekelestik bar. Ǵylym men bilimdi kóteretin jáne jasampaz urpaq bolatyn el ǵana jeńiske jetedi», - dedi. Sondaı-aq, Qazaqstan men Túrkıa arasyndaǵy baýyrlastyq qarym-qatynastardy atap ótken Elshi memleket basshysy Qasym-Jomart Toqaevtyń halyqqa joldaýyna toqtalyp, Qazaqstan Respýblıkasy Prezıdentiniń janyndaǵy Jastar kadrlyq rezervi bastamasy týraly da baıandady.
Ashylý saltanatynda sóz sóılegen stýdentter de jarysqa qatysýshylarǵa jyly lebizderin jetkizip, Elshi A.Saparbekulyna jastarǵa kórsetken qoldaýy úshin alǵystaryn bildirdi.
Ankara, Kaıserı jáne Ystambul qalalarynan 2 quramadan, Izmır, Býrsa, Kastamoný, Konıa, Karabýk jáne Sakarıadan bir-bir quramadan qatysqan jarysta barlyǵy 12 top dodaǵa tústi. Jarysta Býrsa qalasynyń quramasy úzdik bolyp, ekinshi oryndy Ankara qalasynyń Kara Harp áskerı ýnıversıtetiniń quramasy, al úshinshi oryndy Konıa qalasynyń quramasy ıelendi. Jeńimpazdar alǵys hattarmen arnaıy syılyqtarmen marapattaldy.
Sýretter Qazaqstannyń Túrkıadaǵy Elshiliginiń feısbýk paraqshasynan alyndy.
