Memleket basshysy «QTJ» UK» AQ Inovasıalyq ortalyǵyna bardy, dep habarlaıdy Aqorda.
Jıyn barysynda Prezıdent Qasym-Jomart Toqaev Sıan qalasyndaǵy kólik-logıstıka ortalyǵynyń ashylý rásimine telekópir arqyly qatysty.
Memleket basshysy atalǵan sala men jalpy Qazaqstan-Qytaı qatynastary úshin kólik-logıstıka ortalyǵyn ashýdyń mańyzdy ekenin atap ótip, nysandy iske qosty.
Buǵan deıin Qasym-Jomart Toqaev pen Sı Szınpın Qytaıdyń Shensı qalasyn Qazaqstanmen, Ortalyq Azıamen jáne odan ári Eýropamen baılanystyratyn Sıan qurǵaq portynda logıstıka ortalyǵyn salý jóninde ýaǵdalasqan bolatyn.
Sıan – Qytaıdyń toraptyq tranzıttik ortalyǵy jáne eń iri qurǵaq port ornalasqan qalasy. QHR men Eýropa Odaǵy arasyna qatynaıtyn konteınerlik poıyzdardyń 40 paıyzyna jýyǵy osy jerden jóneltiledi.
Sıan qalasyndaǵy qurǵaq portta ornalasqan Qazaqstan termınalynyń jobalyq qýaty – jylyna 66,5 myń JFE (jıyrma fýttyq ekvıvalent). Termınal elimizdiń eksporttaýshylary úshin jańa ótkizý naryqtaryna jol ashady, júkterdi jetkizý merzimin edáýir qysqartady jáne Qazaqstannyń Eýrazıadaǵy senimdi tranzıttik hab retindegi pozısıasyn nyǵaıtýǵa múmkindik beredi.
Sodan keıin Memleket basshysy «QTJ» UK» aksıonerlik qoǵamy men Qytaıdyń Huawei kompanıasy birlesip qurǵan jańa Inovasıalyq ortalyqty ashty.
«QTJ» UK» AQ basqarma tóraǵasy Nurlan Saýranbaevtyń aıtýynsha, atalǵan ortalyq «Aqyldy temir jol» jobasyn júzege asyrý maqsatynda qurylǵan. Memleket basshysyna temirjol kóligi jumysynyń tıimdiligin arttyrýǵa baǵyttalǵan sıfrlyq sheshimder tanystyryldy. Jobalar IT jáne telekomýnıkasıa salalaryndaǵy álemniń jetekshi kompanıalaryn tarta otyryp iske asyrylýda.
Búginde Qazaqstan temirjoly PSA kompanıasymen birlesip, Transkaspıı baǵytynda tutas sıfrlyq dáliz ázirlep, iske qosty. Júıe ýaqytty únemdeıdi jáne tasymaldaý prosesin barynsha ashyq, al Qazaqstandy saýda aǵyndary úshin tartymdy etedi. Wabtec kompanıasynyń lokomotıvterin tıimdi paıdalaný jónindegi pılottyq jobasy júzege asyrylyp jatyr.
Bultty sheshimderdi, Big Data, Internet zattar (IoT) jáne jasandy ıntellektini (AI) paıdalana otyryp, «Qazaqstan temirjolynyń» ınfraqurylymy men qyzmetterin jańǵyrtý jumystary júrgizilýde.
Prezıdent Kólik-logıstıka jáne Inovasıa ortalyqtaryn ashý mańyzdy ekenin atap ótti.
– Bul – «Bir beldeý, bir jol» jahandyq bastamasy boıynsha iske qosylǵan joba. Qazaqstan Tóraǵa Sı Szınpın 2013 jyly bizdiń elimizde jarıalaǵan iri jobany tolyǵymen qoldaıdy. Osy bastamanyń arqasynda ortalyqtyń qurylysy qysqa merzimde aıaqtaldy. Munyń barlyǵy – eki el arasyndaǵy tabysty seriktestik nátıjesi. Bul joba Transkaspıı halyqaralyq kólik dálizin damytýǵa jańa serpin bermek. Sondaı-aq Eýrazıadaǵy saýda-ekonomıka yntymaqtastyǵyn nyǵaıta túsedi dep sanaımyn. Osy ortalyqtyń sapaly salynýyna Qazaqstannyń jáne Qytaıdyń kóptegen mamandary atsalysty. Men búgin barshańyzǵa rızashylyǵymdy bildiremin, – dedi Qasym-Jomart Toqaev.
Prezıdent Qazaqstandy Eýrazıanyń negizgi tranzıt habyna aınaldyrý maqsatynda qabyldanyp jatqan keshendi sharalardy oń baǵalady. Bul rette Memleket basshysy shyn máninde básekege qabiletti bolý úshin zaman talabyna saı ınovasıalyq sheshimder qabyldaǵan jón dep sanaıdy.
– Jýyrda ótken Úkimettiń keńeıtilgen otyrysynda ekonomıkanyń barlyq salasyn sıfrlandyrý máselesine aıryqsha mán berdim. Qazaqstanda ozyq IT-sheshimderdi engizý úshin berik negiz qalyptasqan. Otandyq temirjol salasy «sıfrlyq jarysqa» ýaqyt ozdyrmaı qosylýǵa tıis. Buǵan belgili bir deńgeıde ázirlik bar ekenin kórip otyrmyz. Sıfrlandyrýdy jedeldetý esebinen taıaý arada tasymal tıimdiligin arttyrý jáne shyǵyndardy qysqartý mindeti tur. Bul tek kólik-logıstıka salasynyń ǵana emes, jalpy ekonomıkanyń damýyna tyń serpin beredi. IT-sheshimder retsiz engizilmeı, bir-birin tolyqtyryp, birtutas ekojúıe qalyptastyrýy kerek. Bul – mańyzdy, – dedi Qasym-Jomart Toqaev.
Memleket basshysy atalǵan mindetti júzege asyrýǵa otandyq kompanıalardy tartý qajet ekenin aıtty.
– Men osy jumysqa otandyq İT-kompanıalardy tartý týraly usynysty tolyq qoldaımyn. Elimizde sondaı kompanıalar jáne mamandar az emes. Álemdik İT-kompanıalarmen tıimdi baılanys ornatý kerek. Ekonomıkanyń barlyq salasynda osyndaı strategıany júzege asyrǵan jón, – dedi Prezıdent.
Kezdesý sońynda Qasym-Jomart Toqaev birlesken jobalarǵa atsalysyp jatqan sheteldik kompanıalarǵa alǵys bildirdi.
Sonymen qatar Inovasıalyq ortalyqta Huawei Technologies Kazakhstan kompanıasynyń bas dırektory Chjao Súı, Lianyungang Port Group kompanıasy dırektorlar keńesiniń tóraǵasy Ian Long, Global DTC kompanıasynyń bas dırektory Ýı Tan Iong, Wabtec korporasıasynyń TMD, Eýropa, Taıaý Shyǵys jáne Afrıka boıynsha aǵa vıse-prezıdenti Baıhan Gohan, «Alan TECH» JSHS-niń dırektory Baýyrjan Aıtileý sóz sóıledi.
