Qazaqstan Premer-Mınıstri Álıhan Smaıylov Qyrǵyzstan Mınıstrler Kabınetiniń tóraǵasy – Prezıdent Ákimshiliginiń basshysy Aqylbek Japarovpen kelissóz júrgizdi. Kezdesý Almatyda Eýrazıalyq úkimetaralyq keńestiń otyrysy qarsańynda ótti. Bul týraly Úkimettiń baspasóz qyzmeti habarlady.
Álıhan Smaıylovtyń aıtýynsha, Qyrǵyzstan – elimizdiń strategıalyq áriptesi jáne baýyrlas memleket.
«Memleket basshylarymyzdyń saıası erik-jigeriniń arqasynda búginde qazaq-qyrǵyz qatynastary ózara is-qımyldyń sapaly jańa deńgeıine shyqty», — dedi Premer-Mınıstr.
Sonymen qatar Úkimet basshysy elderimiz arasyndaǵy saýda-ekonomıkalyq ózara is-qımyldyń qarqyndy damyp kele jatqanyn atap ótti. Byltyrǵy tek 11 aıda ózara saýda 12%-ǵa ósip, $1,3 mlrd-qa jetti. Oǵan qosa Qazaqstan men Qyrǵyzstan aradaǵy taýar aınalymynyń kólemin $2 mlrd-qa jetkizý jumysyn jalǵastyrýda.
«Buǵan Úkimetaralyq keńes jáne Óńiraralyq yntymaqtastyq forýmy sıaqty ekijaqty yntymaqtastyq tetikteriniń tıimdi jumysy yqpal etýde. Qazaqstan Úkimeti ári qaraı da barlyq baǵyt boıynsha qazaq-qyrǵyz strategıalyq áriptestigin qoldaýǵa daıyn», — dedi Álıhan Smaıylov.
Óz kezeginde Aqylbek Japarov Qyrǵyzstan men Qazaqstannyń qazirgi qarym-qatynasy aradaǵy saıası dıalogtyń joǵary deńgeıiniń dáleli ekenin atap ótti.
«Jyl saıyn ózara saýda-sattyq pen ınvestısıalar kólemi artyp, iskerlik, ǵylymı jáne mádenı baılanystar jandanýda. Úkimetaralyq keńes aıasynda qyrǵyz-qazaq yntymaqtastyǵynyń ortaq strategıalyq maqsattary, tujyrymdamalyq tásilderi men uzaq merzimdi damý baǵyttary talqylanyp jatyr. Eki el arasyndaǵy belsendi ózara is-qımyl túrli alańdarda júzege asýda», — dedi ol.
Aqylbek Japarov qyrǵyz tarapynyń ózara senim men túsinistikke negizdelgen Qazaqstanmen aradaǵy odaqtastyq qatynastardy odan ári tereńdetýge múddeli ekenin atap ótti.
Kezdesý barysynda úkimet basshylary ekijaqty yntymaqtastyqtyń, onyń ishinde saýda-ekonomıkalyq jáne munaı-gaz salalaryndaǵy máselelerdiń keń aýqymyn qarastyrdy.
Sonymen qatar taraptar qysqa merzimde qazaq-qyrǵyz shekarasynda júk kóligi úshin qosymsha ótkizý beketin ashý máselesin pysyqtaýǵa, sondaı-aq sý-energetıka salasyndaǵy ózara is-qımyldy kúsheıtýge kelisti.
