Jetisý oblysynyń «Kóktal» polıgonynda qazaqstandyq desantshylar men Ázerbaıjan armıasy áskerı qyzmetshileriniń qatysýymen «Altyn qyran-2024» birlesken taktıkalyq-arnaıy oqý-jattyǵýlary jalǵasýda. Bul týraly Ulys Qorǵanys mınıstrligine silteme jasap habarlaıdy.
Birlesken jasaqtardyń komandırleri jaýyngerlik ókim alǵan soń basshylyq shtabyna qabyldanǵan sheshim týraly baıandap, barlaý tapsyrmalaryn oryndaýǵa kiristi. Oqý-jattyǵýdyń ekinshi kúninde olar jaýyngerlik úılesimdiliktiń joǵary deńgeıin kórsetti.
– Birinshi jasaqty qazaqstandyq ofıser, ekinshisin Ázerbaıjan ókili basqarady. Eki el áskerı qyzmetshileriniń taýly jerde barlaý jumystaryn júrgizý tájirıbesi bar. Osy jattyǵýlarda biz óz bilgenimizdi bólisip, baýyrlas memleket áskerı qyzmetshileriniń tájirıbesin qabyldaýdy maqsat etemiz. Bul ofıserler men serjanttar bir sapta ıyq tiresip, bir ústelde tamaqtanyp, bir jaýyngerlik tapsyrmany oryndaǵan kezde tıimdi, – dep túsindirdi oqý-jattyǵý jetekshisiniń orynbasary polkovnık Aǵzam Berdenov.
Tańerteń erte barlaýshylar 25 shaqyrymdyq baǵdar jasady. Onda qarsylastyń lagerine shabýyldap, avtokólik legin torýyldap, taýda jasyrynǵan zańsyz qarýly qurylymnyń bazalyq lagerin izdestirýi kerek.
Ótkiziletin oqý-jattyǵýlar barlaý bólimsheleri jeke quramynyń praktıkalyq daǵdylarynyń deńgeıin arttyrýǵa, maqsat anyqtalǵan jáne ony sáıkestendirgen kezde birlesken barlaý organdarynyń is-qımyl algorıtmin synaqtan ótkizýge, sondaı-aq taýly-shóleıit jerlerde búrkemeleý jáne baǵdarlaý quraldaryn qoldaný daǵdylaryn jetildirýge baǵyttalǵan.
«Altyn qyran-2024» halyqaralyq taktıkalyq-arnaıy oqý-jattyǵýy 24 tamyzǵa deıin jalǵasady.
