Bas prokýratýranyń Aktıvterdi qaıtarý jónindegi komıteti Qaırat Satybaldyulynyń kinásin moıyndaý jáne zańsyz ıemdengen aktıvterin qaıtarý týraly prosestik kelisiminiń sharttaryn oryndaý jumystaryn júrgizýde, dep habarlaıdy Ulys.
Bul aktıvterdiń jalpy somasy baǵalaýdy eskergende, 50 mlrd teńgeden asady. Qazirgi tańda 18 mlrd teńgeniń aktıvteri qaıtaryldy.
«Olardyń qatarynda Almatydaǵy 2 iri bıznes ortalyǵy, komersıalyq jyljymaıtyn múlik jáne Astananyń bedeldi aýdanyndaǵy elıtalyq úı bar.
Satybaldyulynan tintý barysynda alynǵan 95 myń AQSH dollary Arnaıy memlekettik qorǵa aýdaryldy.
Sonymen qatar júzdegen mıllıon teńgege eksklúzıvti zergerlik buıymdar, brendtik saǵattar, koleksıalyq monetalar jáne basqa da sándi buıymdar (kólemi 174 ataý bar) memleketke qaıtaryldy», — dep jazdy baqylaýshy organnan.
Birikken Arab Ámirlikterinen jalpy quny 192 mln teńgeni quraıtyn Rolls-Royce Cullinan jáne Aston Martin markaly kólikter túrindegi aktıvter qaıtaryldy.
Jalpy somasy 33 mlrd teńgeni quraıtyn Q.Satybaldyuly men onyń jaqyndaryna tıesili sheteldik múliktiń tapsyrylýy aıaqtalý satysynda.
«Onyń qatarynda Dýbaı qalasyndaǵy quny 20 mlrd teńge turatyn eki baǵaly vılla; Fransıanyń Kókshil jaǵalaýyndaǵy quny 4 mlrd teńge turatyn tórt elıtalyq páter; quny 5 mlrd teńge turatyn Reseıdiń Máskeý qalasyndaǵy bedeldi turǵyn úı keshenderindegi 15 jyljymaıtyn múlik; quny 4 mlrd teńgeden astam Túrkıanyń Bodrým jáne Stambýl qalalaryndaǵy eki elıtalyq vılla jáne páter jatady.
Basqa isterdi eskere otyryp, Q.Satybaldyuly 2,5 jyl ishinde memleketke 783 mlrd teńgege aktıvterdi qaıtardy», — delingen aqparatta.
