Búgin –Amal merekesi. Elimizde Ulys merekesin jańa formatta toılaý úshin 14-23 naýryz kúnderi Naýryznama onkúndigi dep jarıalandy. Osy Naýryznamanyń alǵashqy kúni batys óńirlerde keńinen toılanatyn, jyldan-jylǵa aıasy keńeıip kele jatqan Amal merekesinen bastaý alady.
Osyǵan oraı Memleket basshysy Qasym-Jomart Toqaev qazaqstandyqtardy Amal kúnimen quttyqtady.
«Áz-Naýryzdyń bastaýy – Amal kúni qutty bolsyn! Bul – halqymyzdyń ejelgi ádet-ǵurpyn jańǵyrtyp, tól mádenıetimizdiń ajyramas bóligine aınalǵan biregeı dástúrimiz. Osy kúni ulttyq bolmysymyz ben qundylyqtarymyz erekshe dáripteledi. El yrysy kóbeıe bersin! Jyl jaqsylyǵymen kelsin!» – dedi Prezıdent.
Amal merekesi – Tabıǵat ananyń, Jer ananyń, jalpy tirshilik ataýlynyń kóktemgi jańarýy men oıanýynyń beınesi. Qazaqstan halqy úshin Amal dástúri otbasydaǵy jylylyq pen tatýlyqpen tyǵyz baılanysty. Jas kishiler úlkenderdiń úıine arnaıy baryp, sálem beredi, Jańa jylda aqsaqaldardan bata suraıdy. Bul dástúr qazaqstandyq mentalıtettiń ajyramas bir bóligi, týys-týǵan, dos-jaran, kórshi-qolańnyń kópten kútken kezdesýin bildiredi. Bul kúni adamdar bir-birine keshirimmen qarap, eski ókpe-renishterden arylýy qajet dep sanalady.
Mádenet jáne aqparat mınıstrliginiń habarlaýynsha, bıyldan bastap Naýryz merekesi jańa formatta toılanady. Budan bylaı jyl saıyn 14 – 23 naýryz aralyǵynda Naýryznama onkúndigi ótkiziledi.
Naýryznamanyń baǵdarlamasy:
14 naýryz kúni – Kórisý kúni-Amal merekesi toılanady. Bul dástúr negizinde elimizdiń batys óńirlerinde saqtalǵan. Búgingi kúni atalǵan merekeni barlyq aımaqtarda toılaý usynyldy.
15 naýryz – Qaıyrymdylyq kúni. Bul kún el boıynsha qaıyrymdylyqqa, meıirim men tatý kórshilikke arnalady.
16 naýryz – Mádenıet jáne ulttyq salt-dástúr kúni. Ol kúni qazaqtyń mádenıeti, óneri men ulttyq qundylyqtary keńinen nasıhattalady.
17 naýryz – Shańyraq kúni. Osy kúni otbasylyq qundylyqtarymyzdy dáripteýge, ónegeli urpaq tárbıelegen úlgili otbasylarǵa arnalǵan mádenı is-sharalar ótedi.
18 naýryz – Ulttyq kıim kúni. Qazaqtyń ulttyq kıimderin nasıhattaýǵa arnalǵan túrli is-sharalardy ótkizý usynylyp otyr.
19 naýryz – Jańarý kúni. Osy kúni kóktemgi aǵash egý dástúrin jalǵastyrý usynyldy.
20 naýryz – Ulttyq sport kúni. Bul kúni eldiń barlyq aımaqtarynda ulttyq sporttan túrli jarystar uıymdastyrylady.
21 naýryz – Yntymaq kúni. Bul kúnniń ıdeıasy – jalpy halyq bir-birine degen syı-qurmetterin arttyryp, tatýlyq pen birlikti nasıhattaý bolyp tabylady.
22 naýryz – Jyl basy. Bul kúni elimizdiń barlyq óńirlerinde jalpyhalyqtyq mádenı-sporttyq is-sharalar ótkizilip, stıldi etnoaýyldar men túrli jármeńkeler uıymdastyrylady.
Al Naýryznamanyń qorytyndy kúni, jańa jyldy qarsy alýdyń sımvoly retinde 23 naýryz – Tazarý kúni dep jarıalandy. Bul kúni Qazaqstannyń barlyq aımaqtarynda jalpyulttyq ekologıalyq aksıa ótedi.
14-23 naýryz aralyǵynda "Naýryz-bazarlyq" maýsymy jarıalanady. Bul kúnderi saýda oryndarynda jappaı satylymdar ótkizý, jeńildikter jasaý josparlanǵan.
