Memleket basshysy Qostanaı oblysynyń ákimin qabyldady

Saıasat

11 qańtar 2024

Memleket basshysy Qostanaı oblysynyń ákimin qabyldady

Prezıdentke Qostanaı oblysynyń byltyrǵy áleýmettik-ekonomıkalyq damýy týraly esep berildi, dep habarlaıdy Aqordanyń baspasóz qyzmeti.

Qumar Aqsaqalov 2023 jyldyń qorytyndysy boıynsha óńirdiń negizgi makroekonomıkalyq ósim kórsetkishterinde oń dınamıka baıqalatynyn baıandady. Atap aıtqanda, óńdeý ónerkásibi 11 paıyz, qurylys salasy 7 paıyz, negizgi kapıtalǵa salynǵan ınvestısıa 8,5 paıyz, kólik tasymaly 3 paıyz, turǵyn úıdi paıdalanýǵa berý kólemi 5 paıyz ósken.

Jalpy óńirlik ónimdegi ónerkásip salasynyń úlesi 30 paıyzdan asty. Ásirese, jergilikti mashına jasaý kásipornynda shyǵarylatyn avtokólik modelderiniń qatary kóbeıip keledi. «SaryarqaAvtoÓnerkásip» JSHS jylyna 30 myń Chevrolet Onix avtokóligin qurastyrý úshin quny 23 mıllıard teńge bolatyn ınvestısıalyq jobany júzege asyra bastady. Nátıjesinde 400 jańa jumys orny ashylmaq.

Sondaı-aq KIA mashına jasaý zaýytynyń qurylysy bastaldy. Koreıalyq avtokonsernmen birlesken bul jobaǵa 90 mıllıard teńge kóleminde ınvestısıa tartylǵan. Atalǵan joba aıasynda jylyna 70 myń kólik shyǵarylady jáne 1,5 myń jańa jumys orny ashylady dep josparlanyp otyr. Buǵan qosa, avtokóliktiń qosalqy bólshekterin óndiretin lokalızasıalyq ortalyq salý kózdelgen. Joba quny – 13 mıllıard teńge.

Byltyr eldi mekenderdi sýmen qamtamasyz etý úshin jalpy quny 21 mıllıard teńge bolatyn 69 joba qolǵa alynǵan. Búginde 37 joba tolyqtaı júzege asyryldy. Nátıjesinde aımaq turǵyndaryn sýmen qamtý kórsetkishi 86,6 paıyzǵa deıin jetken jáne qazirgi ýaqytta 347 aýyl taza aýyzsý tutynyp otyr.

Búginde oblysta jalpy syıymdylyǵy 1 980 oqýshyǵa arnalǵan úsh mekteptiń qurylysy júrgizilip jatyr.

Oblys ortalyǵynda «IQostanay» oqýshylar saraıy ashyldy. Ortalyqta 1300 balanyń jan-jaqty damýyna jaǵdaı jasalǵan. Buǵan qosa, 2025 jylǵa deıin 7500 oryndyq 9 zamanaýı mektep salý josparlanǵan. Onyń ishinde 8 bilim ordasy «Jaıly mektep» jobasy aıasynda paıdalanýǵa beriledi.

Qumar Aqsaqalov Memleket basshysynyń tapsyrmasyna sáıkes qazirgi kezde Aqtóbe oblysynan Qostanaı qalasyna deıin magıstraldy gaz qubyryn tartý úshin tehnıkalyq-ekonomıkalyq negizdeme ázirlenip jatqanyn jetkizdi. Bul joba Qostanaı óńiriniń eldi mekenderin kógildir otynmen qamtamasyz etip qana qoımaı, iri ınvestısıalyq jobalardyń iske asyrylýyna qolaıly jaǵdaı jasaıdy.

Gazben qamtamasyz etý kólemin ulǵaıtý birneshe jobany júzege asyrýǵa, sonyń ishinde ystyq kúıinde brıkettelgen temir shyǵaratyn jáne bolat balqytatyn zaýyttar salýǵa múmkindik beredi. Óz kezeginde bul óńirdiń ekonomıkasyn jandandyryp, jańa jumys oryndary ashylady.

Kezdesý sońynda Memleket basshysy Qasym-Jomart Toqaev oblys ákimine jylytý maýsymyn qalypty rejımde ótkizý, óńirdi gazben qamtamasyz etý jobasyn ýaqytyly júzege asyrý máselelerin Úkimetpen birge aıryqsha baqylaýǵa alýdy, sondaı-aq kóktemgi egis naýqanyna ázirlikti pysyqtaýdy tapsyrdy.

RELATED NEWS

Saıasat

12 sáýir 2025

Qazaqstannyń úsh qalasyna erekshe mártebe berilmek

TMD Syrtqy ister mınıstrleri keńesiniń otyrysynda Astana, Almaty, Qaraǵandy «1941-1945 jj. Eńbek dańqy qalasy» qurmetti ataǵyn berý týraly sheshim kelisildi, dep habarlaıdy Bul týraly SİM habarlady.

Kezdesýde Qazaqstan premer-mınıstriniń orynbasary – syrtqy ister mınıstri Murat Nurtileý TMD uıymyn odan ári damytýǵa baǵyttalǵan birqatar usynysty ortaǵa saldy. Osy turǵyda Qazaqstan bastamalaryn júzege asyrýda Dostastyq boıynsha seriktesterdiń qoldaýy erekshe atalyp ótti.

«Elimizdiń usynysy boıynsha búgingi tańda Volontórler forýmy, Dostastyq jármeńkesi, TMD Akademıalyq astanasy jáne basqa da kóptegen joba birlesken kúsh-jigerdiń arqasynda iske asyrylyp jatyr nemese jaqyn bolashaqta ótkizýge josparlanǵan», – dep málimdedi syrtqy ister mınıstri.

Jeńistiń 80 jyldyǵy qarsańynda TMD elderiniń birqatar qalasyna, sonyń ishinde Astana, Almaty, Qaraǵandy jáne basqa da qalalarǵa «1941-1945 jj. Eńbek dańqy qalasy» qurmetti ataǵyn berý týraly sheshim kelisildi.

Syrtqy ister mınıstrleri keńesiniń kelesi otyrysy 2025 jylǵy qazan aıynda TMD Memleket basshylary samıti qarsańynda Dýshanbe qalasynda ótedi.

Saıasat

28 sáýir 2025

Aqordada Qonaev jáne Alataý qalalaryn damytý máseleleri aıtyldy

Memleket basshysy Almaty oblysynyń ákimi Marat Sultanǵazıevti qabyldady. Qasym-Jomart Toqaevqa Almaty oblysynyń 2025 jyldyń birinshi toqsanyndaǵy áleýmettik-ekonomıkalyq damýy týraly esep berildi. Bul týraly Aqorda habarlaıdy.

Marat Sultanǵazıev ekonomıkanyń negizgi sektorlarynda ósim baıqalatynyn baıandady. Atap aıtqanda, ónerkásiptik óndiris kólemi 507,9 mıllıard teńgeni, aýyl sharýashylyǵy ónimi 97,4 mıllıard teńgeni quraǵan. Shaǵyn jáne orta bıznes sýbektileriniń sany 146,2 myńǵa jetip, 7,7 paıyzǵa artqan.

Prezıdentke jyl basynan beri 12 jańa ónerkásip jobasynyń iske qosylǵany týraly málimet berildi. Onyń ishinde «GALANZ bottlers» óndiris alańynyń keńeıýi, «Bartoǵaı GES-28» jáne Sharyn ózenindegi shaǵyn GES kaskadynyń qurylystary sıaqty aýqymdy jobalar bar. Jalpy, óńirde quny 2,4 trıllıon teńgeni quraıtyn 122 joba júzege asyrylyp jatyr. Nátıjesinde 36 776 jumys orny ashylady.

Memleket basshysyna Qonaev jáne Alataý qalalaryn damytý barysy jóninde aıtyldy. Jańa bas josparǵa sáıkes, oblys ortalyǵynda «Smart Qonaev» qalany basqarýdyń biryńǵaı júıesi engizilýde. Alataý qalasynyń bas josparyna túzetýler jasaý jáne kólik-ınjenerlik ınfraqurylymdy jobalaý jumystary bastaldy.

Oblys ákiminiń aıtýynsha, «Jaıly mektep» ulttyq jobasy aıasynda 17 bilim ordasynyń qurylysy qolǵa alynǵan. Budan bólek, óńirdegi úsh aýysymdy oqý máselesin sheshý úshin memleket-jekemenshik áriptestik negizinde 19 mektep salý josparlanǵan. 2025-2027 jyldary 91 oqý oshaǵynda kúrdeli jóndeý jumystary júrgiziledi.

Memleket basshysy Qonaev jáne Alataý qalalaryn, jalpy Almaty aglomerasıasyn damytýǵa qatysty barlyq belgilengen maqsattardy sapaly ári ýaqtyly oryndaýdyń mańyzyn atap ótti. Prezıdent ındýstrıaldy aımaqtar men Alatau AEA-nyń áleýetin nyǵaıtýǵa, sondaı-aq komýnaldyq jáne eldi mekenderdegi joldardyń qurylysyna basa mán berýdi tapsyrdy.

Saıasat

30 qyrkúıek 2024

Toqaev: Prezıdent – halyq jaldaǵan memlekettik qyzmetker

QR Prezıdenti Qasym-Jomart Toqaev «Eýrazıa keńistigindegi ornyqty damý jáne qaýipsizdik» konferensıasyna qatysty, dep habarlaıdy Aqorda.

Prezıdent óz sózinde buryn-sońdy bolmaǵan geosaıası turaqsyzdyq jaǵdaıynda dıplomatıa sheshýshi rólge ıe bolǵanyn atap ótti.

– Geosaıasat pen geoekonomıkadaǵy túbegeıli ózgerister, jahandyq deńgeıdegi klımattyq jáne demografıalyq syn-qaterler, pandemıanyń jańa qaýpi, qarýlaný básekesiniń órshı túsýi, tehnologıalyq progres, sonyń ishinde jasandy ıntellektini engizý jaǵdaıynda strategıalyq turaqtylyq pen ornyqty damý máseleleri barshamyz úshin ózekti bola tústi. Budan shyǵatyn qorytyndy anyq: halyqaralyq qoǵamdastyq syndarly dıalogqa tyń serpin berýi úshin kún tártibine oń ózgeris jasaýy qajet. Sondyqtan birtutas eýrazıalyq qaýipsizdik ıdeıasy kóppolárly, ádiletti jáne ornyqty álemdik tártipti qalyptastyrýǵa tujyrymdamalyq negiz bola alady, – dedi Qasym-Jomart Toqaev.

Memleket basshysy konferensıa qatysýshylaryna qoǵamdyq ómirdiń barlyq salasynda júzege asyrylyp jatqan Qazaqstandaǵy aýqymdy ózgerister jóninde málimet berdi.

Qasym-Jomart Toqaevtyń pikirinshe, saıası reformalardyń eń basty jańalyǵy – Konstıtýsıada Prezıdent mandatyn 7 jyldyq bir merzimmen shekteý týraly erejeniń bekitilýi.

– Mundaı norma postkeńestik elderdiń, tipti odan tysqary memleketterdiń eshqaısysynda joq. Meniń oıymsha, Prezıdentti bir ret jeti jylǵa saılaý – onyń saılaýaldy baǵdarlamasy men reformalaryn júzege asyrýǵa jetkilikti ýaqyt. Oǵan qosa Prezıdent – halyq jaldaǵan memlekettik qyzmetker. Elimizde Zań men Tártip ústemdik qurýǵa tıis ekenine senimdimin. Tek sonda ǵana reformalardy júzege asyrýǵa, sondaı-aq Qazaqstan ekonomıkasyna ınvestısıa tartýǵa qajetti jaǵdaı jasaı alamyz. Zań men Tártip – Ádiletti Qazaqstannyń negizi. Ádildikke qashan da, qaı jerde de muqtajdyq bar. Bizdiń elde de solaı. Qolǵa alǵan reformalardy iske asyrý qanshalyqty qıyn bolsa da, dittegen maqsatymyzǵa jetpeı qoımaımyz. Ony eshkim toqtatpaq turmaq, baǵytynan jańyldyra almaıdy, – dedi Memleket basshysy.

Qasym-Jomart Toqaev Qazaqstan men Reseı halyqtary arasyndaǵy dostyq baılanystardy nyǵaıtýda bilim salasynyń mańyzy zor ekenin atap ótti. Prezıdenttiń aıtýynsha, qazir Reseıde 60 myńnan astam qazaqstandyq stýdent oqıdy.

– Búginde elimizde Reseıdiń tanymal joǵary oqý oryndarynyń fılıaldary tabysty jumys istep keledi. Qazaqstanda Máskeý memlekettik halyqaralyq qatynastar ınstıtýtynyń fılıalyn ashý josparlanyp otyr, – dedi Qasym-Jomart Toqaev.

Plenarlyq otyrysta Reseı Prezıdentiniń kómekshisi Vladımır Medınskıı konferensıa qatysýshylaryna Vladımır Pýtınniń sálemin jetkizdi.

Máskeý memlekettik halyqaralyq qatynastar ınstıtýtynyń rektory Anatolıı Torkýnov oqý ornynyń 80 jyldyǵyna oraı osynaý is-sharany uıymdastyrǵany úshin Qazaqstan tarapyna alǵys aıtty.

– Biz konferensıa taqyrybyn kezdeısoq tańdaǵan joqpyz. Munyń aıasynda ekonomıka jáne qaýipsizdik salasyndaǵy kópjaqty yntymaqtastyqtyń dástúrli máseleleri klımattyq kún tártibindegi jańa syn-qaterlermen, sondaı-aq Eýrazıa keńistiginde energetıka jáne kólik ınfraqurylymyn damytýdyń jaı-japsarymen birge qaraldy, – dedi Anatolıı Torkýnov.

Jıynǵa Qazaqstan men Reseıdiń kórnekti ǵalymdary, dıplomatıalyq qyzmet ardagerleri, memlekettik organdar men mekemelerdiń basshylary, saıasattanýshylar jáne jastar uıymdarynyń ókilderi qatysty.

Jańalyqtar

25 qarasha 2025