Memleket basshysy Germanıa Federaldyq kansleri Olaf Sholspen keńeıtilgen quramda kelissóz júrgizdi, dep habarlaıdy Aqorda.
Qasym-Jomart Toqaev pen Olaf Shols resmı delegasıa músheleriniń qatysýymen keńeıtilgen quramda kelissóz ótkizdi.
Prezıdent Kanslerdiń elimizge jasaǵan alǵashqy resmı saparynyń máni zor ekenin atap ótip, búgingi kezdesý Qazaqstan men Germanıanyń kópqyrly yntymaqtastyǵyn jańa deńgeıge kóteretinine senim bildirdi.
– Biz jańa ǵana shaǵyn quramda ekijaqty qarym-qatynasty odan ári nyǵaıtý máselesin talqyladyq. Saýda-ekonomıka, ınvestısıa salalaryndaǵy yqpaldastyqty tereńdetýge erekshe nazar aýdaryldy. Budan bólek, ózekti halyqaralyq máseleler týraly sóz qozǵadyq. Atap aıtqanda, qazirgi geosaıası ahýalǵa, jahandyq qaýipsizdikke jáne aımaqtyq damýǵa, klımattyń ózgerýine qatysty pikir almastyq. Sondaı-aq halyqaralyq uıymdar aıasyndaǵy yqpaldastyq máselesin qarastyrdyq. Ekijaqty qarym-qatynastar strategıalyq seriktestik rýhynda damyp keledi. Búgingi kelissózder onyń aıasyn keńeıte túsýge yqpal etetinine senimdimin, – dedi Qasym-Jomart Toqaev.
Memleket basshysynyń aıtýynsha, Germanıa Qazaqstannyń negizgi saýda seriktesteriniń biri jáne ekonomıkamyzǵa ınvestısıa salǵan jetekshi elderdiń sanatyna kiredi.
– Byltyr ekijaqty taýar aınalymy 1,5 esedeı ósip, 4 mıllıard dollarǵa jýyqtady. Bıyl da oń dınamıka baıqalyp otyr. Sońǵy jeti aıda ózara saýda-sattyq kólemi 2,3 mıllıard dollardan asty. 2005 jyldan beri Germanıadan shamamen 6,7 mıllıard dollar kóleminde tikeleı ınvestısıa tartyldy. Bul qarjynyń 90 paıyzy shıkizattyq emes sektorǵa tıesili ekeni qýantady. Búginde Qazaqstanda nemis kapıtalynyń úlesi bar myńnan astam kompanıa jumys isteıdi,– dedi Prezıdent.
Óz kezeginde Germanıanyń Federaldyq kansleri qazaq jerinde kórsetilgen syı-qurmet úshin Qasym-Jomart Toqaevqa alǵys aıtyp, ekijaqty baılanystardyń qarqyndy damyp kele jatqanyna toqtaldy.
– Sizdiń elińizge tikeleı ınvestısıa salý jáne saýda aınalymynyń kólemin arttyrý úshin ekonomıkalyq baılanystarymyzdy jaqsartýǵa barlyq jaǵdaıdy jasaımyz. Árıne, ekonomıkalyq yntymaqtastyqty barlyq salada damytqymyz keledi. Energetıka salasyndaǵy seriktestigimiz dáıekti túrde alǵa jyljyp kele jatqanyna dán rızamyz. Eki el arasynda senimdi ári júıeli yntymaqtastyq ornaǵan. Bul – búkil álemge jaqsy úlgi. Sondaı-aq bizdiń aldymyzda turǵan halyqaralyq syn-qaterler tóńireginde jan-jaqty pikir almasqanymyzǵa qýanyshtymyz, – dedi Olaf Shols.
Taraptar ózara tıimdi saýda-ekonomıkalyq yntymaqtastyqty arttyrýǵa, ásirese, energetıka, «jasyl» transformasıa, taý-ken ónerkásibi, kólik-logıstıka, klımatty qorǵaý, ekologıa jáne aýyl sharýashylyǵy salalaryndaǵy yqpaldastyqty kúsheıtýge múddeli ekenin rastady. Sondaı-aq qazaq-german mádenı-gýmanıtarlyq baılanystaryn nyǵaıtý perspektıvasy qarastyryldy.
Kelissózder qorytyndysy boıynsha Prezıdent Qasym-Jomart Toqaev pen Federaldyq kansler Olaf Shols Qazaqstan Respýblıkasy men Germanıa Federatıvtik Respýblıkasy arasyndaǵy yntymaqtastyq týraly Birlesken deklarasıa qabyldady.
.jpg)
Sonymen qatar resmı delegasıa músheleri mynadaı qujattarǵa qol qoıdy:
1. Qazaqstan Respýblıkasynyń Ulttyq banki men Doıche Býndesbank arasyndaǵy Ortalyq bankter yntymaqtastyǵynyń tehnıkalyq máseleleri jónindegi ózara túsinistik týraly memorandým;
2. Qazaqstan Respýblıkasynyń Ǵylym jáne joǵary bilim mınıstrligi men Germanıa Federatıvtik Respýblıkasynyń Federaldyq Syrtqy ister mınıstrligi arasyndaǵy D.Serikbaev atyndaǵy Shyǵys Qazaqstan tehnıkalyq ýnıversıteti janynan Qazaqstan-Nemis ǵylym jáne tehnologıalar ınstıtýtyn qurý jónindegi nıet týraly memorandým;
3. Qazaqstan Respýblıkasynyń Oqý-aǵartý mınıstrligi, «Samuryq-Qazyna» ulttyq ál-aýqat qory» aksıonerlik qoǵamy men «Vozrojdenıe» qazaqstandyq nemister birlestigi» qoǵamdyq qory jáne Germanıa Federatıvtik Respýblıkasynyń Federaldyq Syrtqy ister mınıstrligi arasyndaǵy qazaq-nemis mektebin qurý nıeti týraly memorandým.
