Qazaqta «din – ustaı alsań qasıetiń, ustaı almasań qasiretiń» degen jaqsy sóz bar. Elimiz Táýelsizdiktiń aq tańy atqan kezeńnen bastap, azamattarynyń dinı-nanym senimine nuqsan keltirmeı, emin-erkin minajat etýine, ǵıbadat jasaýyna barlyq jaǵdaı jasap kele jatyr. Sonyń arqasynda qazaq jerinde egemendiktiń eleń-alańynan beri dinı de, ultaralyq ta qaqtyǵys bolǵan emes. Bul aldaǵy ýaqyttarda da buljymaýy tıis qaǵdıda da bolýy qajet. Astanadaǵy «Allanyń gúli» atalyp ketken Yryskeldi qajy atyndaǵy meshittiń bas ımam Nurlan ımam Baıjigituly da elimizdegi dinaralyq tatýlyqqa joǵary baǵa berip, ony odan ary damyta túsý úshin áli de jumys isteý qajettigin aıtady.
«Búgingi tańda elimizdegi dinaralyq tatýlyq jaqsy deńgeıde damyp, óristep, órkendep kele jatqany shyndyq. Óıtkeni, bul sala qalaı bolǵanda da árdaıym memleketimizdiń basty nazarynda bolýy tıis dep esepteımin. Óıtkeni, dinaralyq, konfesıaaralyq, ultaralyq tatýlyq kúntártibinen esh ýaqytta túspeıdi. Sondyqtan barlyq din qyzmetkerleri ózderiniń dinı dogmalaryn ortaǵa salyp, «meniń aıtqanym bylaı», «meniń dinimde bylaı» demeı, ortaq konsepsıa qalyptastyrýy qajet. Máselen, dóńgelek ústel basynda kezdesken kezde «bizdiń dinimizde bylaı» delingen tek konservatızm túrindegi oı-pikir qalyptasady», - dedi Nurlan ımam.
Onyń paıymynsha, osy salaǵa qaraıtyn Din komıteti nemese mınıstrlik ne bolmasa elordadaǵy Beıbitshilik jáne kelisim saraıynda otyratyn uıymdar, dinı zertteý ortalyqtary tarapynan «din qyzmetkerlerdiń ózara qarym-qatynasy qalaı qalyptasýy kerek», «ne aıtýy tıis jáne qandaı negizgi prınsıpterdi ustanǵany» jón degen másele sheshilýi tıis.
«Áıtpese, barlyq din ókilderi kezdesken kezde hrıstıandar «Kıeli kitapta bylaı» dep, musylmandar «Quranda bylaı delingen» deıdi de, eń sońynda árkim óz pikirinde qalyp qoıady. Sondyqtan barlyq dinge ortaq tatýlyq, birlik, yntymaq, kelisim, tózimshildik sıaqty qundylyqtar negizde ázirlengen jadynama bolýy tıis dep esepteımin. Osy is-sharalar qolǵa alynǵan kezde dinaralyq tatýlyq bekem bola túsedi», - dedi Yryskeldi qajy atyndaǵy meshittiń bas ımam.
Osy oraıda Nurlan ımam Qazaqstannyń dinı emes, zaıyrly memleket ekendigine basa nazar aýdartty.
«Jalpy, memleketimiz dinı memleket emes. Memleket ósip-órkendeımin dese belgili bir dinniń ǵana múddesin qorǵamaýy qajet. Óıtkeni, elmiz kópkonfessıaly bolǵandyqtan jalpy zaıyrlyq prınsıpterin buljytpaı nyq ustanýy tıis. Buǵan qosa, memleket din jumysyna aralaspaýy kerek. Iá, belgili bir deńgeıde shekten shyqsa, keı áreketterdiń elimizdiń konstıtýsıalyq qurylymyna kesirin tıgizetin bolsa, ıaǵnı, kereǵar baǵytta ýaǵyz, nasıhat júrgizilse, onda memleket mindetti túrde aralasýy qajet. Al, jalpy dinı uıymdardyń kez kelgen isine aralasyp, tapsyrma berý arqyly ony memlekettiń qolshoqparyna aınaldyrmaǵan jón», - dedi Nurlan Baıjigituly.
